काठमाडौं । प्रमुख प्रतिपक्षी दल नेकपा माओवादी केन्द्रका सांसद माधव सापकोटाले कांग्रेस–एमालेको सत्तारुढ गठबन्धनले मुलुकमा राज्यशक्तिको दोहन गरिरहेको आरोप लगाएका छन् ।
मंगलवार प्रतिनिधिसभा बैठकको शून्य समयमा उनले सो आरोप लगाएका हुन् । प्रदेशमा मन्त्री र राज्यमन्त्रीहरु बढाउने दुई ठूला दलको गठबन्धनले राज्य शक्तिको दोहन गरिरहेको स्पष्ट भएको सांसद सापकोटाको भनाई थियो ।
उनले भने, ‘कर्णाली प्रदेशमा गरिएको एक सर्भेक्षणले के देखाउँछ भने एउटा मन्त्रालय बढाउँदा वार्षिक १० करोड बराबरको लागत बढन जान्छ‚ यसरी हेर्दा आन्तरिक आम्दानीले साधारण खर्च धान्न नसकेको देखिएको छ। समग्रमा हेर्दा दुई ठूला पार्टीको गठबन्धन राज्यशक्तिको दोहनका लागि भएको भन्ने स्पष्ट छ ।’
उनले दुई ठूला दलको सत्ता गठबन्धनको धरातल कमजोर रहेको जिकिरसमेत गरे । उनले भने, ‘संघमा दुई ठूला दल मिलेर सरकार बनेको झन्डै २ महिना पुग्न लाग्यो तर प्रदेश सरकारहरुको अवस्था हेर्दा यो समीकरणको धरातल उदांगो भएको छ‚ कोशीमा सरकारले अझै पूर्णता पाउन सकेको छैन‚ गण्डकीमा ७ वटा मन्त्रालय छन्‚ १० वटाको छलफल चलिराखेको छ। कर्णालीमा एक मन्त्री थपियो। बागमतीमा मन्त्रालयको टुंगो नलागीकन विना विभागीय मन्त्रीहरुको शपथ छ ।’
सांसद सापकोटाले ठूला दलले प्रदेश सरकार बनाउने कामलाई अझै पूर्ण दिन नसकेकोमा पनि असन्तुष्टि व्यक्त गरे । उनले भने, ‘लुम्बिनी र सुदूरपश्चिममा मन्त्रीहरु बढाउने र मन्त्रीहरु थप्ने तयारी भईराखेको छ। मधेशमा राज्यमन्त्री र मन्त्रीहरुको लर्को र सम्बन्धित मुख्यमन्त्रीको दलको स्पष्टीकरण ।’
