काठमाडौं । त्रिभुवन विमानस्थलबाट बरामद गरिएको करिब एक सय किलो सुन तस्करी प्रकरणमा पक्राउ परेका तीन जना रिहा भएका छन् ।
यही साउन दुई गते विमानस्थल भन्सार जाँचपास भएर बाहिरिएको करिब एक सय किलो सुन राजश्व अनुसन्धान विभागको टोलीले बरामद गरेको थियो । उक्त प्रकरणमा पक्राउ परेका व्यवसायी रोहन अडुकिया र दुई चिनियाँ नागरिकलाई आज (शनिबार) रिहा भएका हुन् ।
अडुकियालाई खोजेका बेला उपस्थित हुने सर्तमा विमानस्थलस्थित अध्यागमन कार्यालयले छाडेको त्रिभुवन अन्तर्राष्ट्रिय विमानस्थलका सुरक्षा प्रमुख डीआईजी अर्जुन चन्द ठकुरीले जानकारी दिए ।
यस्तै सोही प्रकरणमा पक्राउ परेका ली जियालिङ र लिउ फुयान नामका दुई चिनियाँ नागरिकलाई घटनामा संलग्नता नदेखिएको भन्दै नेपाल प्रहरीको केन्द्रीय अनुसन्धान ब्युरो (सीआईबी)ले आजै बिहान रिहा गरेको हो ।
राजस्वले कालोसूचीमा राख्न गरेको सिफारिसका आधारमा अध्यागमन विभागले चिनियाँ नागरिक ली जिएलिन र लुई फुयानलाई पक्राउ गरेर प्रहरीको केन्द्रीय अनुसन्धान ब्युरो (सीआईबी)लाई बुझाएको थियो ।
राजश्व अनुसन्धान विभागले ३ साउनमा हङकङबाट आएको १५५ किलो सुनसहितको ‘ब्रेक शु’ बरामद गरेको थियो । त्यसको १९ दिनपछि यसमा संगठित अपराधको कसूर आकर्षित हुने देखिएको भन्दै थप अनुसन्धानका लागि सीआईबीलाई जिम्मा लगाएको थियो ।
