कैलाली । कर्णाली नदीमा हाम फालेका युवा अझै फेला पर्न सकेका छैनन् । कैलालीको चिसापानीस्थित कर्णाली पुलबाट हाम फालेपछि ती युवा नदीमा बगेर बेपत्ता भएका थिए ।
सोमबार दिउँसो पुलबाट हाम फालेका लम्की–चुहा नगरपालिका–३, बस्ने ३० वर्षीय लोकेन्द्र शाही बेपत्ता छन् । उनको खोजीका लागि गोताखोरको टोली परिचालन भएको छ । मङ्गलवार बेलुकीसम्म शाही नभेटिएको जिल्ला प्रहरी कार्यालयका प्रवक्ता प्रहरी नायब उपरीक्षक कुलदीप चन्दले बताए ।घटनालगत्तै नेपाल प्रहरी र सशस्त्र प्रहरीको टोलीले खोजी कार्य गरिरहेको छ ।
सोमबार दिउँसो कर्णाली पुलबाट हाम फालेका १७ जनामध्ये शाही नदीमा बगेर बेपत्ता भएका थिए । पुलबाट हाफ फाल्नुअघि उनीहरूले चिसापानीमा मदिरा सेवन गरेको खुलेको प्रहरीले जनाएको छ ।
प्रहरीका अनुसार शरीरको माथिल्लो भागको लुगा फुकालेर पुलमा गइरहेका उनीहरूलाई प्रहरीले पुलवारि रोक्न खोजेको थियो । तर, पुलमा सामूहिक फोटो खिच्ने भन्दै उनीहरू जबर्जस्ती गएका थिए ।
