काठमाडौं । जेनजी आन्दोलनको क्रममा झण्डै २ दर्जन होटलहरुमा ठूलो क्षति पुगेको छ । होटल सङ्घ नेपाल (हान)ले सङ्कलित प्रारम्भिक जानकारीअनुसार प्रत्यक्ष प्रभावित होटलहरु काठमाडौं उपत्यका, पोखरा, बुटवल, भैरहवा, झापा, मोरङ विराटनगर, धनगढी, महोत्तरी, दाङ तुल्सीपुर लगायतका क्षेत्रमा सञ्चालित स्वदेशी तथा विदेशी ब्राण्ड समेतका चर्चामा रहेका होटल प्रतिष्ठानहरूमा ठूलो क्षति भएको हानले जनाएको हो ।
होटल र प्रतिष्ठानमा भएका तोडफोड, आगजनी, लुटपाटबाट काठमाडौंमा रहेको हिल्टन होटलको मात्रै ८ अर्बभन्दा बढीको क्षति समेत गरी देशैभर करिब २५ अर्बभन्दा बढी क्षति भएको प्रारम्भिक अनुमान छ ।
यसबाट प्रभावित सदस्य होटलहरु मर्मतसम्भार, पुनर्निर्माण नगरी सञ्चालनमा आउन नसक्ने हुँदा करिब दुई हजारभन्दा बढी कामदार कर्मचारीको चाडपर्वको समयमा रोजीरोटीमा समेत प्रत्यक्ष प्रभाव पर्ने र हाल सञ्चालन अवरुद्ध भएका यी होटलहरुले व्यहोर्नुपर्ने बैङ्क-वित्तीय संस्थालगायतका आर्थिक दायित्व नियमित रूपमा तिर्न बुझाउन असमर्थ रहने देखिएको छ ।
सुशासन विकास र जनताले खोजेको मूलभूत परिवर्तनका लागि दर्जनौँ नव युवाहरूले जीवन बलिदान गरेका र सयौँ घाइते महान् योद्धाहरूको त्यागबाट सफल रहेको आन्दोलनबाट प्रारम्भ हुन लागेको सङ्क्रमणकालीन हालको अवस्थामा सर्वसाधारणको सेयर लगानी भएको पब्लिक लिमिटेड कम्पनीसहितको निजी क्षेत्रका यस प्रकारको ठूलो लगानी र सम्पत्तिमा भएको पीडादायी क्षतिको यथाशीघ्र शक्तिशाली अधिकारप्राप्त न्यायिक समितिबाट जाँचबुझ हुनुपर्ने हानको माग छ ।
विज्ञप्तिमा भनिएको छ, ‘अपराधीलाई उचित क्षतिपूर्ति सहितको दण्ड हुन तथा मर्मत सम्भार पुनर्निर्माणका लागि राज्यबाट आर्थिक प्याकेज उपलब्ध गराएर लगानीकर्ताको मनोबल कायम राख्न तथा आर्थिक स्थायित्व तथा समृद्धि हासिल गर्दै परिवर्तनकारी नयाँ युगमा पर्यटन विकासको कार्यमा सँगसँगै अघि बढ्न होटल सङ्घ नेपाल जोडदार माग गर्दछ ।’
