वासिङ्टन डीसी । अमेरिकामा टिकटकको स्वामित्वबारे चीन र अमेरिका बीच फ्रेमवर्क सम्झौता भएको अमेरिकी ट्रेजरी सेक्रेटरी स्कट बेसेन्टले बताएका छन् । म्याड्रिडमा सम्पन्न व्यापार वार्तामा उक्त सहमति अमेरिकी स्वामित्वको मार्ग खोल्ने गरी भएको हो ।
ट्रेजरी सेक्रेटरी बेसेन्टका अनुसार, आगामी शुक्रबार अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङले सम्झौतामा औपचारिक हस्ताक्षर गर्नेछन् । चीनले भने यसबारे औपचारिक प्रतिक्रिया दिएको छैन ।
ट्रम्पले आफ्नो सामाजिक सञ्जाल ट्रुथ सोसल मा म्याड्रिड वार्ता धेरै सकारात्मक भएको उल्लेख गर्दै, हाम्रो युवाले जोगाउन खोजेको विशेष कम्पनीमा सम्झौता भएको बताएका छन् ।
यो सहमति त्यसबेला आएको हो जब टिकटकको चिनियाँ स्वामित्व बाइटडान्सलाई अमेरिकामा आफ्नो सञ्चालनका लागि नयाँ स्वामित्व खोज्न वा प्रतिबन्ध सामना गर्नुपर्ने अन्तिम समयसीमा नजिकिँदै थियो ।
यस प्रारम्भिक सहमतिले टिकटकको भविष्य अमेरिकामा सुनिश्चित गर्ने आधार तयार पारेको बताइएको छ ।
