काठमाडौं । नेपाली राष्ट्रिय क्रिकेट टोली युएईको भिसा कुरिरहेको छ । विश्व विजेता वेस्ट इन्डिजविरुद्ध ऐतिहासिक तीन खेलको टी-२० सिरिजका लागि टोली आज युएई प्रस्थान गर्ने तयारीमा थियो ।
आज बिहान ९ बजेको उडानका लागि टिकट बुक गरिए पनि भिसा प्राप्त नभएपछि यात्रा स्थगित भएको छ । नेपाल क्रिकेट सङ्घ (क्यान) ले भिसाका लागि सबै प्रक्रिया पूरा गरिसकेको जनाएको छ । तर, हालै नेपालमा भएको राजनीतिक घटनाक्रमपछि युएईले नेपाली नागरिकका लागि भिजिट भिसा रद्द गरेको कारण यो समस्या उत्पन्न भएको हो ।
क्यानका प्रवक्ता छुम्पी लामाले युएई सरकार र इमिरेट्स क्रिकेट बोर्डसँग समन्वय भइरहेको बताएका छन् । उनले आज वा भोलिसम्म भिसा प्राप्त हुने सम्भावना रहेको जानकारी दिएका छन् ।
यो सिरिज, जसलाई क्यानले ‘युनिटी कप अन्तरराष्ट्रिय टी-२० सिरिज’ नाम दिएको छ, युएईको शारजाह क्रिकेट स्टेडियममा असोज ११, १२ र १४ गते आयोजना हुनेछ । टोली सिरिजको तयारीका लागि एक साता अगाडि युएई पुग्ने योजनामा थियो । यसैबीच, हिजो राष्ट्रिय खेलकुद परिषद्का सदस्य-सचिव टंकलाल घिसिङले टोलीलाई बिदाइ गरेका थिए ।
टेस्ट मान्यता प्राप्त राष्ट्रविरुद्ध सिरिज खेल्न लागेको यो नेपालको पहिलो अवसर हो । यो सिरिजपछि नेपाली टोली टी-२० विश्व कप छनोटका लागि ओमान प्रस्थान गर्नेछ ।
