काठमाडौं । नेपाली कम्युनिस्ट पार्टीका सहसंयोजक माधवकुमार नेपालले आफ्नो पार्टीले अब नेपालको राजनीतिमा स्वच्छताको नेतृत्व गर्ने बताएका छन् ।सुदूरपश्चिमको धनगढीमा शुक्रवार आयोजित ‘एकता सन्देश सभा’ लाई सम्बोधन गर्दै उनले राजनीतिमा इमानदारी र समर्पणको खाँचो रहेको बताए ।
उनले वर्तमान राजनीतिक दलहरूमा अपराधीकरणको गम्भीर समस्या रहेको आरोप लगाए । ‘दलहरूमा दलालीकरण, ठेकेदारीकरण, व्यापारीकरण, भ्रष्टीकरण र अपराधीकरणको प्रवृत्ति अत्यधिक बढेको छ,’ नेपालले भने, ‘यी विकृतिहरूको अन्त्य गरेर नेपालको राजनीतिलाई स्वच्छ बनाउने जिम्मेवारी अब नेपाली कम्युनिस्ट पार्टीले लिनेछ ।’
उनले देशमा कुशासन र भ्रष्टाचार व्याप्त रहेको भन्दै त्यसलाई निर्मूल पार्ने काममा पनि आफ्नो पार्टीले अगुवाइ गर्ने दाबी गरे । ‘राजनीतिमा लाग्नेहरूलाई जबसम्म इमानदारी, देशप्रतिको समर्पण, देश बनाउने हुटहुटी र जनताप्रति चिन्ता हुँदैन, तबसम्म देश बन्दैन,’ उनले थपे, ‘हामीलाई देश र जनताको साँच्चै चिन्ता छ । त्यही चिन्ताबाट प्रेरित भएर हामी अघि बढिरहेका छौँ ।’
