काठमाडौं । पाकिस्तानको कराँचीमा आइतबार सयौँ प्रदर्शनकारीहरूले अमेरिकी वाणिज्य दूतावासमा आक्रमण गरेका छन् । इरानका सर्वोच्च नेता आयातुल्लाह अली खामेनेईको अमेरिका-इजरायलको संयुक्त हवाई आक्रमणमा मृत्यु भएको खबरपछि यो हिंसात्मक विरोध प्रदर्शन भएको हो ।
प्रदर्शनकारीहरूले दूतावासको बाहिरी सुरक्षा घेरा तोडेर भवनका झ्यालहरू फुटाएका थिए र केही भागमा आगजनीसमेत गरेका थिए । भीडलाई नियन्त्रण गर्न प्रहरीले अश्रुग्याँस र लाठीचार्ज प्रयोग गर्नुपरेको थियो । ईदी फाउन्डेशनका अनुसार घटनामा कम्तीमा ६ देखि ८ जनाको मृत्यु भएको छ भने दर्जनौँ घाइते भएका छन् ।
मृतकहरूको शव र घाइतेहरूलाई कराँचीको सिभिल अस्पताल पुर्याइएको छ । अधिकांश घाइतेहरूमा गोली लागेको छ । सिन्धका गृहमन्त्री जियाउल हसन लञ्जरले घटनाको छानबिनका लागि तत्काल रिपोर्ट मागेका छन् । उनले कानुन हातमा लिन नदिने चेतावनी दिँदै संवेदनशील स्थानहरूको सुरक्षा बढाउन र यातायात व्यवस्थापनका लागि वैकल्पिक मार्ग प्रयोग गर्न निर्देशन दिएका छन् ।
ट्राफिक प्रहरीले प्रभावित क्षेत्रमा सडक बन्द भएको जानकारी दिँदै हेल्पलाइन १९१५ मा सम्पर्क गर्न आग्रह गरेको छ । यो घटना खामेनेईको मृत्युपछि विश्वव्यापी रूपमा अमेरिका र इजरायलविरुद्ध देखिएको आक्रोशको हिस्सा हो ।
