काठमाडौं । आजदेखि एकसाता लामो सार्वजनिक बिदा सुरु भएको छ । फगुपूर्णिमा, निर्वाचन, महिला दिवस र शनिवारसमेत जोड्दा आजदेखि लगातार सात दिन सार्वजनिक बिदा हुने भएको हो ।
यही फागुन २१ गते हुने प्रतिनिधि सभाको निर्वाचनका लागि सरकारले तीन दिन सार्वजनिक बिदा दिएको छ । यही फागुन २०, २१ र २२ गते तीन दिन सरकारले निर्वाचन बिदा दिएको छ ।
निर्वाचनको बिदा सुरु हुनुअघि आज र भोलि होली पर्व परेको छ । होलीका लागि आज फागुन १८ गते पहाडी जिल्लामा सार्वजनिक बिदा छ भने भोलि फागुन १९ गते तराईका जिल्लामा सार्वजनिक बिदा छ ।
फागुन २३ गते शनिवार परेको छ। फागुन २४ गते नारी दिवस परेको छ। हरेक वर्ष संसारभर ८ मार्चलाई अन्तर्राष्ट्रिय नारी दिवसका रूपमा मनाउने गरिन्छ । त्यो दिन पनि सरकारले सार्वजनिक बिदा दिँदै आएको छ ।
नेपाल राष्ट्र बैङ्कले भने होली र निर्वाचनका सार्वजनिक बिदाका दिन पनि बैङ्किङ सेवा उपलब्ध गराउन बैङ्क तथा वित्तीय संस्थालाई निर्देशन दिएको छ ।
