काठमाडौं । उरुग्वे र केप भर्डे दुवैले आ९आफ्नो पहिलो खेलमा अप्रत्याशित नतिजा निकालेपछि समूह एच पूर्ण रूपमा खुला बनेको छ । अब भोली बिहान हुने विश्वकप खेल दुवै टोलीका लागि निकै निर्णायक हुने देखिएको छ ।
अमेरिकाको मियामी स्टेडियममा हुने यो खेल नेपाली समय अनुसार भोली विहान ३: ४५ बजेदेखि सुरु हुनेछ ।
केप भर्डेले आफ्नो विश्वकप डेब्यु खेलमै स्पेनलाई गोलरहित बराबरीमा रोक्दै ठूलो आश्चर्य दिएको थियो । खेलभर स्पेनले २७ वटा प्रहार गरे पनि केप भर्डेले मजबुत र अनुशासित रक्षा प्रदर्शन गर्दै खेल बराबरीमा टुङ्ग्याएको हो ।
अर्कोतर्फ उरुग्वेले पनि आफ्नो पहिलो खेलमा २७ पटक गोल प्रयास गरे पनि साउदी अरेबियासँग १-१ को बराबरीमा रोकियो। उरुग्वेलाई खेलको अन्त्यतिर मात्रै म्याक्सी अराउजोको गोलले हारबाट जोगाएको थियो ।
केप भर्डेले पहिलो खेलमा देखाएको रक्षात्मक रणनीति सफल भएकाले यो खेलमा पनि उनीहरू गहिरो रक्षात्मक खेल खेल्ने अपेक्षा गरिएको छ ।
केप भर्डेका अनुभवी गोलरक्षक भोझिन्हाले स्पेनविरुद्ध उत्कृष्ट प्रदर्शन गर्दै सातवटा बचाउ गरेका थिए । ४० वर्षका उनी आफ्नो अनुभवले टोलीलाई ठूलो भरोसा दिएका छन् । रक्षापंक्तिमा पिको लोपेसले पनि उत्कृष्ट भूमिका निभाएका थिए। उनले धेरै बल रोक्ने र खतरनाक अवस्था हटाउने काम गरेका थिए ।
उरुग्वेको तर्फबाट पनि म्याक्सी अराउजो नै मुख्य खेलाडी बनेका छन् । उनले गोलसँगै धेरै अवसर सिर्जना गरेका थिए । नयाँ भूमिकामा सेन्टर डिफेन्डरका रूपमा खेलेका माथियास ओलिभेराले पनि राम्रो प्रदर्शन गरेका थिए । तर उरुग्वेको गोलरक्षक फर्नान्डो मुस्लेराको गल्तीले साउदी अरेबियालाई अग्रता लिन अवसर दिएको थियो। यो खेलमा पनि गोलरक्षक छनोटबारे प्रशिक्षकको निर्णय महत्त्वपूर्ण हुने देखिन्छ।
तथ्याङ्क अनुसार उरुग्वे समूह चरण पार गर्ने बलियो सम्भावना राख्छ, तर पहिलो खेलको बराबरीपछि उनीहरूलाई जित आवश्यक छ । उरुग्वेले पछिल्ला विश्वकप समूह खेलहरूमा राम्रो प्रदर्शन गर्दै आएको छ, तर गोल गर्ने क्षमतामा अझ सुधार आवश्यक देखिएको छ ।
दुवै टोली पहिलो पटक आमनेसामने हुन लागेका हुन् । उरुग्वेले अफ्रिकी टोलीविरुद्ध अहिलेसम्म हार नखेपेकाले इतिहास पनि उनीहरूको पक्षमा छ । तर केप भर्डेको स्पेनविरुद्धको प्रदर्शनले यो खेलमा कुनै पनि नतिजा सम्भव छ भन्ने सन्देश दिएको छ ।
