काठमाडौं । महिला एसिया कप क्रिकेटको उपाधिका लागि आज भारत र श्रीलंकाबीच प्रतिस्पर्धा हुँदै छ । सन् २०२४ को फाइनलमा श्रीलङ्काले भारतलाई स्तब्ध पार्दै पहिलो पटक उपाधि जितेको दुई वर्षपछि यी दुवै टोली पुनः च्याम्पियन बन्न दुबई अन्तर्राष्ट्रिय क्रिकेट स्टेडियममा आमनेसामने हुन लागेका हुन् । खेल नेपाली समय अनुसार राति सवा ८ बजे सुरु हुनेछ ।
प्रतियोगितामा दुवै टोली अहिलेसम्म अपराजित रहेका छन् । भारतीय टोली आठौँ पटक एसिया कपको उपाधि जित्ने लक्ष्यमा छ भने श्रीलङ्काली टोली अघिल्लो संस्करणको जितलाई दोहोर्याउने लक्ष्यमा हुने छ ।
श्रीलङ्काली टोली कठिन परिस्थितिबाट सम्हालिएर जित निकाल्न माहिर देखिएको छ । सेमिफाइनलमा पाकिस्तानविरुद्ध ३३ रनमा ४ विकेट गुमाइसकेको अवस्थामा पनि हर्षिता समराविक्रमा र कविशा दिलहारीले टोलीलाई जित दिलाएका थिए ।
सन् २०२४ को डम्बुलामा भएको फाइनलमा १६५ रनको लक्ष्य पछ्याउँदै श्रीलङ्काले भारतलाई ८ विकेटले हराएको इतिहासका कारण श्रीलङ्काली टोली उच्च मनोबलका साथ मैदान उत्रनेछ ।
हालसम्म यी दुई टोलीबीच भएका ३१ टी-२० अन्तर्राष्ट्रिय खेलहरूमा भारतले २५ खेल जितेको छ भने श्रीलङ्काले ५ खेलमा मात्र जित निकालेको छ । यद्यपि, ठूला मञ्चमा श्रीलङ्काले भारतलाई कडा टक्कर दिँदै आएको छ ।
