काठमाडौं । आज सङ्घीय संसद्का चार समितिको बैठक बस्दै छ । आज प्रतिनिधि सभाका अन्तर्राष्ट्रिय सम्बन्ध र पर्यटन समिति र शिक्षा, स्वास्थ्य तथा सूचना प्रविधि समितिको बैठक बस्दै छ भने राष्ट्रिय सभाका विधायन व्यवस्थापन समिति र सङ्घीयता सबलीकरण तथा राष्ट्रिय सरोकार समितिको बैठक बस्दै छ ।
आज बिहान १० बजेदेखि सुरु हुने अन्तर्राष्ट्रिय सम्बन्ध र पर्यटन समितिको बैठकमा पर्यटन विधेयक, २०८१ का सम्बन्धमा क्यासिनो क्षेत्रका व्यवसायीहरूसँग छलफलको कार्यसूची रहेको छ ।
त्यस्तै, बिहान ८ बजेदेखि सुरु हुने शिक्षा, स्वास्थ्य तथा सूचना प्रविधि समितिको बैठकमा भोटेकोशी नदीमा आएको विनाशकारी बाढीबाट प्रभावित क्षेत्रमा भएको मानवीय एवं भौतिक क्षति, उद्धार, राहत, पुनःस्थापना एवं पुनःनिर्माणका सम्बन्धमा शिक्षा तथा खेलकुद मन्त्रालयबाट भएका एवं भइरहेका कार्य, त्यस्ता कार्यसम्पादनका क्रममा देखा परेका समस्या तथा चुनौती र आगामी दिनमा यस सम्बन्धमा मन्त्रालयले अवलम्बन गर्ने रणनीतिका सम्बन्धमा शिक्षा मन्त्री र सचिवसँग छलफलको कार्यसूची रहेको समितिले जानकारी दिएको छ ।
त्यसैगरी, बिहान ११ बजे र दिउसो १ बजे बस्ने बस्ने राष्ट्रिय सभा अन्तर्गतको विधायन व्यवस्थापन समितिको बैठकमा सङ्क्रामक पशु रोग नियन्त्रण विधेयक, २०८३ को प्रतिवेदन माथि छलफल र आन्तरिक वायुसेवाको दायित्व सम्बन्धी विधेयक, २०८३ माथि सैद्धान्तिक छलफलको कार्यसूची रहेको समितिले जनाएको छ ।
त्यस्तै दिउसो १स् १५ बजेदेखि सुरु हुने सङ्घीयता सबलीकरण तथा राष्ट्रिय सरोकार समितिको बैठकमा समितिको वार्षिक प्रतिवेदन सम्बन्धमा छलफलको कार्यसूची रहेको छ ।
