काठमाडौं । सत्तारुढ दल नेकपा (माओवादी केन्द्र)को पदाधिकारी बैठक पार्टी केन्द्रीय कार्यालय पेरिसडाँडामा जारी छ ।
आजको बैठकले केन्द्रमा मन्त्रालय भागबण्डा र प्रदेश सरकारका बारे पार्टीको दाबी र अडान प्रष्ट पार्ने बताइएको छ ।
यस्तै, नयाँ गठबन्धनमा लागि माओवादीको ‘पोजिसन’बारे पनि बैठकले प्रष्ट पार्ने बताइएको छ ।
सत्तासाझेदार दलहरुबीच केन्द्र सरकार र प्रदेश सरकारमा सहभागिता र नेतृत्वका विषयमा छलफल भइरहेका छन् । तर, ठोस सहमति भइसकेको छैन । सरकार विस्तारबारे छलफलका बीच पार्टी पदाधिकारी बैठक आज बसेको हो ।
पार्टी अध्यक्ष तथा प्रधानमन्त्री पुष्पकमल दाहाल ‘प्रचण्ड’ केन्द्रदेखि प्रदेशको सत्ता समीकरणमा प्याकेजमा सहमति खोज्ने प्रयासमा छन् ।
सत्ता बाँडफाँडको विषयमा ठोस सहमति हुन नसकेको कारण प्रधानमन्त्रीमाथि अझै १६ वटा मन्त्रालयको भार रहेको छ । बैठकले माओवादीको बटमलाइन तय गर्ने बताइएको छ ।
