काठमाडौं । बर्दिवासबाट १२ दिन हिँडेर काठमाडौं आइपुगेका मिटरब्याज पीडित रातभर सडकमा बस्न बाध्य भएका छन् ।
सोमबार खुलामञ्च प्रवेश गर्न लागेका पीडितलाई महानगर प्रहरीले प्रवेश नदिएपछि उनीहरु खुलामञ्चको गेटबाहिर सडकमा नै बस्न बाध्य भएका हुन् ।
उनीहरु रातभर खुलामञ्चको पश्चिमी गेटबाहिरै बस्न बाध्य भएको अभियन्ता कुमार बर्तौलाले जानकारी दिए । मिटरब्याज पीडितहरु खुलामञ्च या माइतीघरमा बस्ने योजना बनाएर आएका थिए । तर, महानगरले उनीहरुलाई दुबै ठाउँमा बस्न नदिएको हो ।
महानगर प्रहरीले ओढ्ने र ओछ्याउने समेत खोसेर लगेको संघर्ष समितिलाई सहयोग गर्दै आएका संघर्ष दाहालले बताए । उनका अनुसार सहयोगीले ल्याइदिएका खानेकुरा समेत प्रहरीले खोसेको छ । उनिहरुले खाना र छानाविना रात बिताएका छन् ।
मिटर ब्याज पीडितहरु खुलामञ्चमा बस्ने तयारी गरेको थाहा पाएपछि काठमाडौं महानगरपालिकाले सोमबार दिउँसो नै खुलामञ्चको गेटमा ताला लगाएको थियो ।
११ दिनसम्म हिँडेर आइतबार काठमाडौं आइपुगेका पीडितले बिहान मातातीर्थमा खाना खाएर खुलामञ्च आएका थिए । खुलामञ्चमा महानगर प्रहरीले प्रवेश गर्न रोक लगाएपछि तनावको अवस्था सिर्जना भएको थियो ।
उता काठमाडौँ महानगरपालिकाका मेयर बालेन साहले फेसबुमा स्टाटस लेख्दै पीडितलाई पशुपति धर्मशालामा बस्ने प्रबन्ध मिलाए पनि नमानेको दाबी गरेका छन् ।
अभियानमा आफ्नो ऐक्यबद्धता भएको र यस्तो अवस्थामा कसैले पनि काठमाडौँ आउन नपरोस् भन्ने उनले सामाजिक सञ्जालमा उल्लेख गरेका छन् । यद्यपि खुलामञ्चमा बस्न नदिएको विषयमा उनले केहि बताएका छैनन् । खुलामञ्च जनताको आवाज उठाउने ठाउँ भएकाले पनि यो ठाउँ खुला रहनुपर्ने पीडितको भनाइ छ ।
