चितवन । जिल्ला कारागार भरतपुरबाट भागेका कैदीबन्दीलाई प्रशासनको सम्पर्कमा आउन जिल्ला सुरक्षा समितिले अनुरोध गरेको छ ।
बुधबार बेलुका सुरक्षा समितिको तर्फबाट प्रमुख जिल्ला अधिकारी गणेश अर्यालले सूचना जारी गरि जिल्ला कारागार भरतपुरबाट बुधबार बिहान गेट फोडेर निस्किएका कैदीबन्दीलाई प्रशासनको सम्पर्कमा आउन अनुरोध गरेका हुन् ।
अर्यालले जारी गरेको सूचनामा कारागार छोडेर निस्किएकै कारण कैदीबन्दीलाई फरक व्यवहार नगरिने तर, सम्पर्कमा नआए पक्राउ गरेर ल्याउने बताएका छन् ।
चितवन कारागारबाट ७५० जनाको संख्यामा कैदीबन्दी बुधबार बन्दोबस्तीको समानसहित निस्किएका थिए । उनीहरुले प्रहरीको हातहतियार समेत लगेको सुरक्षा समितिले जनाएको छ ।
सूचनामा हातहतियारसमेत फिर्ता गर्न भनिएको छ । केही कैदीबन्दीलाई भारतसीमाबाट नियन्त्रणमा लिइएको थियो । यसैगरि सुरक्षा समितिले बिस्तारै निशेधाज्ञा खुकुलो बनाउँदै लैजाने पनि जनाएको छ ।
