काठमाडौं । लगातारको वर्षा, बाढी र पहिरोका कारण नेकपा (एमाले) को केन्द्रीय सचिवालय बैठक स्थगित भएको छ । पहिले असोज १९ र २० गतेका लागि तय भएको बैठक अब असोज २४ गते बस्ने गरी सरेको एमाले केन्द्रीय कार्यालयका सचिव डा। भीष्म अधिकारीले जानकारी दिए।
बैठक आगामी असोज २७, २८ र २९ गते बस्ने केन्द्रीय कमिटी बैठकको एजेन्डा तय गर्न बोलाइएको हो । हालैको ‘जेनजी आन्दोलन’ पछि पार्टी पुनर्गठनको माग बढिरहेको सन्दर्भमा यो केन्द्रीय कमिटी बैठकलाई विशेष महत्वका साथ हेरिएको छ । उक्त बैठकले पार्टीको ११औँ महाधिवेशनको मिति तय गर्न सक्ने सम्भावना छ ।
