काठमाडौं । मधेश प्रदेश मुख्यमन्त्री सरोज यादवको नियुक्ति प्रक्रियाविरुद्ध सर्वोच्चमा दारय रिटमाथि आज सुनुवाइ हुँदैछ । एमालेबाहेकका ७४ प्रदेश सभा सदस्यले दायर गरेको रिटमा सुनुवाइका लागि आज पेसी तोकिएको हो ।
संविधानको धारा १६८ (३) बमोजिम गठन भएको सरकारविरुद्ध मधेशका ७४ सांसदले मंगलबार सर्वोच्च अदालतमा रिट दर्ता गराएका थिए । उनीहरूले नियुक्तिको निर्णय स्थगन गरी पुनः संवैधानिक विधिबाट मुख्यमन्त्री नियुक्ति प्रक्रिया आह्वानका लागि अन्तरिम आदेश माग गरेका छन् ।
यसअघि मंगलबारै सर्वोच्च अदालतका न्यायाधीश टेकप्रसाद ढुंगानाको इजलासले मुख्यमन्त्री यादवलाई दीर्घकालीन प्रभाव पर्ने कुनै पनि काम नगर्न आदेश दिइसकेको छ ।
स्वास्थ्य उपचारका लागि भन्दै जनकपुरबाट काठमाडौंतर्फ हिँडेकी तत्कालिन प्रदेश प्रमुख सुमित्रा भण्डारीले दलहरुलाई छलेर प्रदेशसभाको ठूलो दलको हैसियतमा एमाले संसदीय दलका नेता यादवलाई बर्दिवासको एक होटलमा शपथ ग्रहण गराएपछि असन्तुष्ट दलहरु सर्वोच्च पुगेका हुन् ।
