काठमाडौं । नेपाली कांग्रेसले पुस २६ देखि २८ सम्म १५ औँ महाधिवेशन गर्ने निर्णय लिएको छ । कांग्रेसको निर्णय अनुसार मङ्सिर २० गतेबाटै महाधिवेशनको कार्यक्रम सुरु हुने छ ।
लामो समयदेखि चलिरहेको कांग्रेस केन्द्रीय बैठकमा विशेष महाधिवेशनको माग भएको थियो । तर, पुसमा नियमित महाधिवेशन गर्ने निर्णय गर्दै बैठक आज सकिएको हो । बैठकपछि प्रवक्ता डा. प्रकाशशरण महतले महाधिवेशन कार्यतालिका सार्वजनिक गरेका हुन् ।
महाधिवेशन कार्यतालिका:
- मङ्सिर २० गतेभित्रै नयाँ क्रियाशील सदस्य केन्द्रबाट वितरण गरिसक्ने
- जिल्लाको प्रतिनिधसभा, क्षेत्रीय समिति हुँदै वडासम्म नयाँ क्रियाशील सदस्यको फाराम पठाउने अवधि २४ गतेसम्म । पुस ८ गतेभित्र सबै निर्वाचन क्षेत्रमा नयाँ क्रियाशील सदस्यताको कार्य सम्पन्न गर्ने ।
- क्रियाशील सदस्यताको प्रारम्भिक छानबिन समितिले गरेको निर्णय उपर परेको पुनरावेदन र क्रियाशील सदस्यता केन्द्रीय छानबिन समितिमा नयाँ र नवीकरणसम्बन्धी परेका उजुरी उपर अन्तिम निर्णय गरी अन्तिम सूची तयार गरी केन्द्रीय सभापति र कार्यवाहक सभापतिलाई बुझाउने मिति पुस १४ गते ।
- नयाँ क्रियाशील सदस्यता वितरण गर्दा समावेशीता नवयुवा पुस्ता अन्य पार्टीबाट आएका नवप्रवेशीलाई समेत क्रियाशील सदस्यता दिने व्यवस्था ।
- विदेशस्थित जनसम्पर्क समितको अधिवेशन पुस १५ ।
- गाउँ नगर र वडा अधिवेशन पुस १६ गते ।
- गाउँ नगरपालिका अधिवेशन पुस १७ गते ।
- प्रदेश सभा क्षेत्रीय अधिवेशन पुस १९ गते ।
- प्रतिनिधिसभा क्षेत्रीय अधिवेशन पुस २१ गते ।
- एकभन्दा बढी प्रतिनिधिसभा क्षेत्र भएको जिल्ला अधिवेशन पुस २२ गते ।
- प्रदेश अधिवेशन २३ र २४ गते ।
- महाधिवेशन पुस २६, २७ र २८ गते ।
