काठमाडौँ । युनाइटेड अरब इमिरेट्स यूएईले नेपालबाट रोजगारीमा जाने श्रमिकका लागि प्रहरी रिपोर्ट पीसीसी प्रमाणीकरण अनिवार्य गर्दै प्रतिव्यक्ति १४ हजार २ सय रुपैयाँ अतिरिक्त शुल्क लिन थालेको छ ।
जेनजी आन्दोलनपछि सुरक्षा कारण देखाउँदै यूएईले प्रहरी रिपोर्टलाई आफ्नो परराष्ट्र मन्त्रालयबाट समेत प्रमाणीकरण गराउनुपर्ने व्यवस्था लागू गरेको हो । नेपालमा यो प्रक्रिया भीएफएसमार्फत गरिँदै आएको छ । यसअघि कन्सुलर सेवा विभागबाट प्रमाणीकरण भएपछि भिसा जारी हुने व्यवस्था थियो ।
नेपाल वैदेशिक रोजगार व्यवसायी संघका महासचिव महेश बस्नेतले यसलाई श्रमिकमाथिको अनावश्यक आर्थिक बोझ र संस्थागत लुटको संज्ञा दिएका छन् । उनका अनुसार वार्षिक यूएई जाने करिब १ लाख ७७ हजार नेपाली श्रमिकबाट प्रहरी रिपोर्ट प्रमाणीकरणकै नाममा अर्बौँ रुपैयाँ बाहिरिन सक्ने अवस्था छ ।
श्रम, रोजगार तथा सामाजिक सुरक्षा मन्त्रालय र परराष्ट्र मन्त्रालयले कूटनीतिक पहल थालेको बताए पनि यूएईतर्फबाट अहिलेसम्म ठोस जवाफ आएको छैन । श्रम विज्ञहरूले एकतर्फी रूपमा यस्तो शुल्क लगाउनु गलत भएको भन्दै नेपाल सरकारले कडा कूटनीतिक पहल गर्नुपर्ने बताएका छन् ।
