विश्व बक्सिङ च्याम्पियनसिप : सुमिना पराजित « Drishti News – Nepalese News Portal
Logo

विश्व बक्सिङ च्याम्पियनसिप : सुमिना पराजित


दृष्टि संवाददाता


काठमाडाैं । पोल्याण्डमा भइरहेको आइबा युथ पुरुष तथा महिला विश्व बक्सिङ च्याम्पियनसिपमा नेपाली बक्सिङ खेलाडी सुमिना खड्का पराजित भएकी छन् ।

पोल्यान्डको किल्सीमा आज भएको खेलमा महिला ५४ किलो तौल समूहतर्फ नेपाली खेलाडी खड्का बेलारुसकी विनाराभा आर्नासित अङ्कका आधारमा पराजित भएकी हुन् । खड्काले तीन राउन्डसम्म प्रतिस्पर्धा गरेको नेपाल बक्सिङ सङ्घका प्रवक्ता श्यामकाजी अवालेले जानकारी दिनुभयो । उक्त प्रतियोगितामा नेपालबाट खड्का र सुष्मा तामाङ सहभागी भएकी छन् ।

महिला ४८ किलो तौल समूहमा तामाङ वाइ पाएर दोस्रो चरणमा प्रवेश गरेकी छन् । अब उनले लिथुआनियाकी खेलाडीसित प्रतिस्पर्धा गर्नेछन् ।

गत वर्ष चैत पहिलो साता ललितपुरको सातदोबाटोमा सम्पन्न छनोट खेलमा खड्काले डेचेन शेर्पालाई तथा तामाङले रमिसा श्रेष्ठलाई पराजित गरेका थिइन् ।  पोल्याण्डमा जारी प्रतियोगितामा ५२ मुलुकका २७४ पुरुष तथा १४० महिला खेलाडीको सहभागिता रहेको छ । विश्व बक्सिङ च्याम्पियनसिप यही वैशाख १० गतेसम्म चल्ने छ ।

प्रतिक्रिया दिनुहोस्