विभिन्न जिल्लामा चट्याङ लागेर चार जनाको मृत्यु « Drishti News – Nepalese News Portal
Logo

विभिन्न जिल्लामा चट्याङ लागेर चार जनाको मृत्यु


दृष्टि संवाददाता


काठमाडौँ । देशका विभिन्न जिल्लामा चट्याङ लागेर चार जनाको ज्यान गएको छ । बिहीबार साँझ हावाहुरीसहित चट्याङ पर्दा बाग्लुङ, स्याङ्जा, भोजपुर र तेह्रथुममा गरी चार जनाको ज्यान गएको हो ।

बिहीबार बेलुका परेको चट्याङ्ग लागेर बाग्लुङको तारखोला गाउँपालिका–२ सिलेका ४५ वर्षका खिमलाल कँडेलको ज्यान गएको प्रहरीले जनाएको छ।

उनको धौलागिरी अस्पताल बागलुङमा उपचारका क्रममा राति १० बजे ज्यान गएको हो । यस्तै, स्याङ्जाको फेदीखोला गाउँपालिका–५ मा पनि चट्याङ्ग लागेर एक जनाको ज्यान गएको छ । घरमा बसिरहेका बेला चट्याङ्ग लागेर घाइते भएकी ३९ वर्षकी ईश्वरी लामिछानेको गण्डकी अस्पतालमा उपचारका क्रममा ज्यान गएको हो ।

यसैबीच, भोजपुरको षडानन्द गाउँपालिका–८ निगुरेमा ६० वर्षकी मनमाया राईको पनि चट्याङ्ग लागेर ज्यान गएको छ । त्यस्तै तेह्रथुमको, छथर गाऊपालिका ६ असिने बस्ने ९ वर्षीया बालिका रोहिता मगरको पनि ज्यान गएको छ ।

बिहीबार बेलुका ७ बजे बालिका मगरको आफ्नै घरमा बसिरहेको अवस्थामा चट्याङ लाग्दा बाँया तर्फको टाउकोदेखि घाँटीसम्म जलेको थियो । अचेत अवस्थामा रहेकी उनको उपचारको लागि अस्पताल लैजाने तयारी हुँदाहुदै राति सवा ११ बजे घरैमा मृत्यु भएको थियो ।

प्रतिक्रिया दिनुहोस्