काठमाडौं । अर्थमन्त्री जनार्दन शर्माले स्वदेशी वस्तुमा आत्मनिर्भर हुन कृषि क्षेत्रलाई प्राथमिकतामा राखिएको बताएका छन् ।
सिंहदरबारमा सोमबार बसेको प्रतिनिधिसभा अन्तर्गतको उद्योग समिति बैठकमा अर्थमन्त्री शर्माले विभिन्न बस्तु आयात गर्दा व्यापार घाटा बढ्ने र मूल्यवृद्धिसमेत भएकाले कृषि क्षेत्रलाई प्राथमिकतामा राखिएको बताएका हुन् ।
यसैगरी धानमा आत्मनिर्भर हुन सरकारले अध्ययन गरिरहेको उहाको भनाई छ । अर्थमन्त्री शर्माले आगामी आर्थिक बर्षको बजेटमा अनावश्यक रुपमा करको दायरा हेरफेर नगरिएको उनले दाबी गरे ।
त्यस्तै उनले स्वदेशी सेनेटरी प्याडको उत्पादनलेसमेत माग धान्न नसकेका कारण बाहिरबाट आउने सेनेटरी प्याडमा कर छुट दिइएको जिकिर गरे । सरकारको स्वदेशी उद्योगलाई ध्वस्त पार्ने कुनै योजना नरहेको मन्त्री शर्माको भनाइ थियो ।
बैठकमा उद्योग वाणिज्य तथा आपुर्ति मन्त्री दिलेन्द्र प्रसाद बडूले उद्योगलाई सहज सञ्चालनका लागि सरकारले आवश्यक सहजिकरण गर्ने बताए ।
बन्द भएका उद्योगहरुलाई सञ्चालनका लागि नीजि क्षेत्रको सहयोग लिइने धारणा उनको थियो ।
मन्त्री बडूले पेट्रोलियम पदार्थको मूल्यबृद्धि बाध्यात्मक अवस्था भएको जिकिर गरे ।
