गोरखा । गोरखा नगरपालिकाले सदरमुकामको पुरानो बजारस्थित ठूलोआँगनमा पृथ्वीनारायण शाहको शालिक राख्ने तयारी गरेको छ ।
गोरखा नगरपालिकाको आर्थिक सहयोग र नेपाली सेनाको अगुवाइमा ठूलो आँगनको बीच भागमा पृथ्वीनारायण शाहको ७ फिट ३ इन्च अग्लो पूर्ण कदको शालिक बनाउने तयारी गरिएको हो ।
शालिक निर्माणपछि प्रत्येक दिन पृथ्वीनारायण शाहकालीन पोशाक तथा हतियारमा नेपाली सेनाको शार्दुलजंग गुल्मको ११ जनाको टोलीले ‘राष्ट्र निर्माता सलामी’ अर्पण गर्ने नेपाली सेनाले जनाएको छ ।
नेपाली सेना गोरखाको रिपुमर्दन गणका गणपति हेमराज विष्टका अनुसार हरेक दिन बिहान सूर्याेदय र सर्यास्तको समयमा राष्ट्र निर्मातालाई सलामी अर्पण गरिने भएको छ। सलामी अर्पणको समयमा बिगुलमार्फत बिजयी ध्वनि बजाइने र माइक जडान गरेर ठूलोआँगनमा सुनिने व्यवस्था मिलाइने सेनाले जनाएको छ ।
