शेखरको निर्देशनपछि कृषिमन्त्रीले दिए राजीनामा

काठमाडौं । कृषिमन्त्री रामनाथ अधिकारीले पदबाट राजीनामा दिएका छन् । मन्त्री अधिकारीले केहि बेरअघि पदबाट राजीनामा दिएका हुन् । उनका सहयोगी विजय अधिकारीले मन्त्री अधिकारीले राजीनामा प्रधानमन्त्री केपी शर्मा ओलीलाई मेल गरिसकेको पुष्टि गरे ।

सोमबार जेनजीको प्रदर्शनमा १९ जनाको मृत्यु भएपछि नेता शेखर कोइरालाले चीनबाटै आफ्ना समूहबाट सरकारमा मन्त्री रहेकाहरुलाई राजीनामा दिन निर्देशन दिएका थिए । त्यसपछि उनीनिकट मन्त्री अधिकारीले आज राजीनामा दिएका हुन् ।

शेखर समूहबाट सरकारमा रहेका अन्य मन्त्रीमा बद्री पाण्डे संस्कृति, पर्यटन तथा नागरिक उड्डयन मन्त्री र तेजुलाल चौधरी युवा तथा खेलकुद मन्त्री छन्। कांग्रेसबाटै गृहमन्त्री बनेका रमेश लेखकले त घटनाकै दिन सोमबार साँझ पदबाट राजीनामा दिइसकेका छन्।