काठमाडौँ । जेनजी प्रदर्शनका क्रममा आगजनी र तोडफोड भएर क्षति पुगेको बानेश्वरस्थित बीआईसीसी भवनमा अब संसद बैठक नबस्ने भएको छ ।
प्रदर्शनका क्रममा आगलागी भइ क्षतिग्रस्त सङ्घीय संसद् भवन आज तीन मन्त्रीले निरीक्षण गरेका छन् । आगामी पुससम्म सिंहदरबारभित्र निर्माणाधीन नयाँ संसद भवन तयार भई त्यहीँबाट बैठक सञ्चालन हुने अर्थमन्त्री रामेश्वर खनाल र मन्त्री कुलमान घिसिङले बताएका छन् ।
बीआईसीसी भवनलाई पुरानै स्वरूपमा पुनर्निर्माण गरिने र तत्काल सरसफाइ तथा डिजाइनको काम सुरु हुने बताइएको छ। राष्ट्रिय सभाको बैठक भने सिंहदरबारस्थित कृषि तथा प्राकृतिक स्रोत समिति हलमा बस्ने तयारी भइरहेको छ ।
संसद विघटन भई आगामी फागुन २१ मा निर्वाचन तोकिएको अवस्थामा, आगामी अधिवेशनहरू नयाँ व्यवस्थापनसहित सञ्चालन हुने सरकारी तयारी देखिएको छ ।
