काठमाडौं। नेकपा (एमाले) को ११औँ महाधिवेशनको भृकुटीमण्डपमा जारी बन्द सत्रमा अध्यक्ष केपी शर्मा ओलीले पूर्वराष्ट्रपति विद्यादेवी भण्डारीको पार्टी सदस्यताबारे स्पष्ट धारणा राखेका छन् ।
वरिष्ठ उपाध्यक्ष ईश्वर पोखरेलले भण्डारीको सदस्यता उठाएपछि जवाफ दिँदै ओलीले भण्डारी राष्ट्रपति भएका कारण संवैधानिक बाध्यताले सदस्यता छोडेकी भए पनि फर्किन चाहे नयाँ निवेदन दिनुपर्ने बताए ।
उनले भने, ‘उहाँले पार्टीलाई घृणा गरेर सदस्यता छाड्नुभएको होइन, तर राष्ट्रपतिको ७ वर्षे कार्यकालको सदस्यता जोड्न मिल्दैन । यो कानुनसँग खेलबाड हुन्छ । फर्किन मन लागे ‘म सदस्य हुन चाहन्छु’ भनेर पार्टीमा निवेदन दिनुपर्छ ।’
ओलीले भण्डारी सेरेमोनियल पदमा रहेकाले सम्मानित र निर्विवाद जीवन बिताउँदा राम्रो हुने सुझाव दिए । कार्यकारी पदमा फर्किए आलोचना र विवादको चक्रव्यूहमा पर्ने भन्दै उनले भने, ‘राष्ट्रको अभिभावक भइसकेकी व्यक्तित्वले विरोधको सामना नगर्दा उचित हुन्छ ।’
