सन् २०२५ मा कृत्रिम बुद्धिमत्ता आर्टिफिसियल इन्टेलिजेन्स एआईको बढ्दो प्रयोगका कारण विश्वभर झन्डै ५५ हजारभन्दा बढी मानिसले रोजगारी गुमाएका छन् ।
अमेजन, माइक्रोसफ्ट र सेल्सफोर्सजस्ता ठूला कम्पनीहरूले हजारौं कर्मचारी कटौती गर्दा एआईलाई प्रमुख कारणका रूपमा उल्लेख गरेको विश्वप्रसिद्ध वित्तीय च्यानल सीएनबीसीले जनाएको छ ।
यस वर्ष अमेरिकामा मात्रै करिब ११ लाख ७० हजार रोजगारी कटौती भएको छ, जुन सन् २०२० को कोभिड-१९ महामारीपछिको सबैभन्दा ठूलो संख्या हो । अमेजनले यस वर्ष आफ्नो इतिहासकै सबैभन्दा ठूलो कर्मचारी कटौती गर्दै १४ हजार कर्पोरेट पद हटाएको छ । अमेजनका प्रमुख कार्यकारी अधिकृत एन्डी जेसीले एआईको प्रयोग बढेसँगै कम्पनीको कार्यबल घट्ने यसअघि नै संकेत गरिसकेका थिए ।
त्यस्तै, माइक्रोसफ्टले यस वर्ष करिब १५ हजार कर्मचारी कटौती गरेको छ। भारतको आईटी सेवा क्षेत्रमा पनि प्रभाव देखिएको छ, जहाँ टाटा कन्सल्टेन्सी सर्भिसेज ९टीसीएस० ले करिब २० हजार रोजगारी कटौती गरेको छ ।
सेल्सफोर्सले सेप्टेम्बरमा ४ हजार ग्राहक सेवा कर्मचारी हटाउँदै एआईले करिब ५० प्रतिशत काम गर्न सक्ने दाबी गरेको छ । मानव संसाधन व्यवस्थापन प्लेटफर्म वर्कडेले पनि एआईमा लगानी बढाउनुपर्ने भन्दै १ हजार ७ सय ५० कर्मचारी कटौती गरेको जनाएको छ ।
यसैबीच, म्यासाचुसेट्स इन्स्टिच्युट अफ टेक्नोलोजी एमआईटीले नोभेम्बरमा सार्वजनिक गरेको अध्ययन अनुसार एआई हाल अमेरिकी श्रम बजारको करिब ११।७ प्रतिशत काम गर्न सक्षम भइसकेको छ । यद्यपि, कर्मचारी कटौतीका वास्तविक कारणमा एआईको भूमिका कति निर्णायक छ भन्ने विषयमा भने अझै विवाद कायमै रहेको छ ।
