काठमाडौं । पुर्व प्रधानमन्त्री खालिदा जियाको निधनमा बङ्गलादेशमा तीन दिनको राष्ट्रिय शोकको घोषणा गरिएको छ ।
सरकारका प्रमुख सल्लाहकार मुहम्मद युनुसले खालिदा जियाको बुधवार अन्त्येष्टि प्रार्थनाको दिन सार्वजनिक बिदा र तीन दिनको राष्ट्रिय शोकको घोषणा गरेका हुन् ।
टेलिभिजन सम्बोधनमा युनुसले खालिदा जियाको निधनसँगै राष्ट्रले एक अभिभावक गुमाएको बताए । उनले उनलाई बङ्गलादेशको राजनीतिमा एक गहिरो प्रख्यात व्यक्तित्वको रूपमा वर्णन गरे, जसको लोकतन्त्रको सङ्घर्ष, बहुदलीय राजनीतिक संस्कृतिको स्थापना र जनताको अधिकारको वकालतमा असाधारण भूमिका इतिहासमा अमिट रहनेछ । निरङ्कुशता र फासीवादविरुद्धको उनको अटल नेतृत्वले राष्ट्रलाई अलोकतान्त्रिक सङ्कटहरूबाट बारम्बार मार्गदर्शन गरेको उल्लेख गर्दै युनुसले राष्ट्रले खालिदा जियाको योगदानलाई श्रद्धाका साथ सधैँ सम्झने बताए ।
लामो समयदेखि कलेजो, मिर्गौला, मधुमेह र आँखाको रोगसहित विभिन्न स्वास्थ्य समस्याहरूबाट पीडित खालिदा जियाको उपचारको क्रममा आज बिहान ८० वर्षको उमेरमा निधन भएको थियो ।
