काठमाडौं । नेपाली कांग्रेसका नेता शशाङ्क कोइरालाले कुनै पनि हालतमा पार्टी विभाजन नहुने बताएका छन् ।
सोमबार पार्टी सभापति शेरबहादुर देउवासँगको भेटवार्तापछि बाहिरिने क्रममा सञ्चारकर्मीहरूसँग संक्षिप्त कुराकानी गर्दै उनले यस्तो बताएका हुन् ।
पार्टीभित्रको आन्तरिक विवाद समाधानका लागि सहमतिको प्रयास भइरहेको बताउँदै कोइरालाले भने, ‘मिल्नका लागि प्रयास हुँदै छ । पार्टी कुनै हालतमा ‘ब्रेक’ (विभाजन) गर्नु हुँदैन भन्ने हाम्रो धारणा हो ।’
महामन्त्रीद्वय गगन थापा र विश्वप्रकाश शर्मासहितको इतर पक्षले विशेष महाधिवेशनको प्रक्रिया अघि बढाएपछि कांग्रेसमा पार्टी विभाजन हुने हो की भन्ने तरङ्ग पैदा भएको छ । यही सन्दर्भमा संस्थापन र असन्तुष्ट पक्षबीच सहमतिको विन्दु खोज्न नेताहरू सक्रिय भएका छन् । सोही क्रममा कोइरालाले सभापति देउवासँग छलफल गरेका हुन् ।
