काठमाडौं । स्वास्थ्य बीमा बोर्डले देशभरका सबै अस्पताल र स्वास्थ्य संस्थालाई बीमित बिरामीलाई उपचारको क्रममा बाहिर औषधि खरिद गर्न नलगाउन निर्देशन दिएको छ।
बोर्डका सूचना अधिकारी विकेश मल्लका अनुसार केही स्वास्थ्य संस्थाले बीमा प्याकेजभित्र समावेश औषधि तथा औषधिजन्य सामग्री बिरामीलाई बाहिर किन्न लगाउने गरेको गुनासो प्राप्त भएको थियो । त्यसैले बोर्डले परिपत्रमार्फत सबै अस्पताललाई यस्तो नगर्न निर्देशन दिएको हो ।
“केही अस्पतालले बीमितलाई उपचारपछि बाहिरका औषधि पसलबाट औषधि किन्न लगाएको गुनासो आएको छ। बीमा प्याकेजमा पर्ने औषधि अस्पतालमै उपलब्ध गराउनुपर्छ,” मल्लले भने ।
स्वास्थ्य बीमा ऐन २०७५ र नियमावली २०७५ अनुसार बिरामीलाई बाहिरबाट औषधि किन्न लगाउने अस्पताललाई कारबाही गरिने बोर्डले चेतावनी दिएको छ। नियम उल्लङ्घन गर्ने अस्पतालले दण्ड भोग्नुपर्नेछ।
स्वास्थ्य बीमा कार्यक्रममा पाँच सदस्यसम्मको परिवारले वार्षिक ३ हजार ५०० रुपैयाँ योगदान गरेमा एक लाख रुपैयाँसम्मको स्वास्थ्य सेवा सुविधा पाउने व्यवस्था छ। थप सदस्य समावेश गर्दा प्रति सदस्य ७०० रुपैयाँ योगदान थपिने र प्रत्येक सदस्यका लागि २० हजार रुपैयाँ बराबरको सेवा सुविधा थपिने प्रावधान पनि छ।
