काठमाडौं । प्रधानमन्त्री बालेन शाहले मातातीर्थ औँसी अर्थात् आमाको मुख हेर्ने दिनको अवसरमा सम्पूर्ण आमाहरूप्रति श्रद्धा र सम्मान व्यक्त गर्दै शुभकामना दिएका छन् । शुक्रवार सामाजिक सञ्जालमार्फत उनले आमा र मातृभूमिको महिमा स्वर्गभन्दा पनि उच्च रहेको उल्लेख गरेका छन् ।
‘जननी जन्मभूमिश्च स्वर्गादपि गरीयसी’भन्ने शास्त्रीय वचनलाई उद्धृत गर्दै शाहले आमाको काखलाई न्यानो र चरणलाई तीर्थजस्तै पवित्र भएको बताएका छन् । उनले सृष्टिकी मुहान आमाहरूलाई माया र त्यागको अनुपम उदाहरणका रूपमा चित्रण गर्दै सम्पूर्ण आमाहरूको दीर्घायुको कामना गरेका छन् ।
आफ्नो शुभकामना उनले आमालाई जीवनको पहिलो गुरु र अनन्त ममताकी स्रोतका रूपमा सम्मान व्यक्त गरेका छन् । प्रधानमन्त्री शाहले सन्तानका रूपमा आफूहरूको कर्मले आमाहरूलाई सधैँ गर्व महसुस गराउन सकौँ भन्ने भावना व्यक्त गर्दै भनेका छन्, ‘आमालाई सधैँ हँसाउन सकौँ, हामी सन्तानहरूको कर्ममा आमाले सदैव गर्व गर्न सकून् ।’
शुभकामनामा उनले मातृभक्तिसँगै देशभक्तिलाई पनि जोड्दै भनेका छन्, ‘हे जननी ! म नेपाल आमा हाँसेको हेर्न चाहन्छु !
