काठमाडौं । सेक्युरिटी गार्डमा मलेसिया जान लागेका सप्तरीका अजयकुमार यादवसँग तीन लाख रूपैयाँ माग्ने म्यानपावरका कर्मचारी पक्राउ परेका छन् ।
काठमाडौंको कोटेश्वरस्थित ग्राण्ड स्विट जब नाम गरेको म्यानपावरका एक कर्मचारीलाई शनिवार युवा, श्रम तथा रोजगार मन्त्री रामजी यादवको सचिवालयकै सक्रियतामा प्रहरी सहितको टोलीले ‘स्टिङ अपरेसन’ चलाएर पक्राउ गरेको हो ।
मन्त्री यादवका स्वकीय उपससचिव सरोज यादवका अनुसार सरकारको ‘फ्रि भिसा फ्रि टिकट’को नीति अनुरूप म्यानपावर कम्पनीलाई प्रोसेस गरिदिएकामा बढीमा १० हजार रूपैयाँमात्र तिर्नुपर्नेमा अजयकुमारले ७० हजार रूपै याँ पहिल्यै तिरिसकेको थिए ।
तर म्यानपावरले उनीसँग ३ लाख लागत लाग्ने भए पनि १० हजार छुट गरिदिएको भनेर बाँकी पैसा मागेको थियो । अजयकुमार को फ्लाइट गत वैशाख २९ गते हुने तय थियो । तर म्यानपावरले ३ लाख नतिरी उड्न नपाउने भनेपछि उनी तय भएकै मितिमा मलेसिया जान नपाएको बताइएको छ ।
म्यानपावर कम्पनीले बाँकी २ लाख २० हजार रूपै याँ तिरे जेठ ३ गते उडाइदिने बताएको थियो । त्यसपछि उनी पैसाको जोहो गरी नाइट बस चढेर शनिवार बिहान काठमाडौं ओर्लिएका थिए ।
म्यानपावर कम्पनीको एक जना कर्मचारीले शनिवारै बिहान अजयलाई फोन गरेका थिए । पासपोर्ट र अरू कागजात आफूसँग भएको बताउँदै ती कर्मचारीलाई तीनकुने गैरीगाउँस्थित पेट्रोल पम्प अगाडि भेट्न बोलाएका थिए ।
त्यतिबेलासम्म अजयले युवा, श्रम तथा रोजगार मन्त्री रामजी यादवको सचिवालयलाई आफूले भोगेका समस्या सुनाइसकेका थिए । अजयको समस्या समाधान गर्न मन्त्री यादवका स्वकीय उपसचिव सरोज यादव आफै खटिएको मन्त्रीको सचिवालयको दाबी छ ।
उनी केही सञ्चारकर्मीका साथ तीनकुनेस्थित प्रहरी वृत्त पुगेका थिए। त्यहाँ प्रहरी अधिकारीहरूका साथ सो टोली अजय र म्यानपावरका ती कर्मचारी भेट्दै गरेको ठाउँसम्म पुग्यो । म्यानपावरमा भिसा शाखामा काम गर्ने बताउने ती कर्मचारीले सुरूमा अजयसँग पैसा मागेका थिए ।
अजयले पासपोर्ट र कागजात दिएपछि मात्र पैसा दिन्छु भनेपछि केहीबेर भनाभन भएको थियो । त्यसलगत्तै प्रहरीले म्यानपावरका ती कर्मचारीलाई नियन्त्रणमा लियो ।
फ्रि भिसा फ्रि टिकट नीतिअनुसार १० हजारमा हुने काममा ३ लाख मागेको स्वीकारेपछि ती कर्मचारीलाई तीनकुने प्रहरीले काठमाडौं उपत्यका अपराध अनुसन्धान कार्यालय पुर्याइएको मन्त्रीको सचिवालयले जनाएको छ ।
ग्रान्ड स्विट जबका ती कर्मचारीको साथबाट ४ वटा पासपोर्टसहित फ्लाइट टिकट र अन्य महत्त्वपूर्ण कागजात भेटिएको थियो । उनले चारै जनासँग रकम लिएर कागजात दिने मनसाय बनाएको पाइएको सचिवालयले जनाएको छ ।
