काठमाडौं । नेपाली कांग्रेसका नेता पूर्णबहादुर खड्काले पार्टी सभापति गगन थापालाई पार्टीभित्रको सम्पूर्ण एकताका लागि तत्काल पहल गर्न आग्रह गरेका छन् ।
खड्काले सामाजिक सञ्जालमार्फत पार्टीको आधिकारिकतासम्बन्धी विवादमा सर्वोच्च अदालतले पुनरावलोकनका लागि निस्सा दिएपछि कांग्रेसका नेता तथा कार्यकर्ताबीच सामाजिक सञ्जालमा भइरहेका टिप्पणीप्रति चिन्ता व्यक्त गर्दै एकताको पहल गर्न सभापति थापालाई आग्रह गरेका हुन् ।
उनले मुलुकको राष्ट्रियता सङ्कटपूर्ण अवस्थामा रहेको र लोकतान्त्रिक संविधानमाथि चुनौती देखिएको भन्दै यस्तो अवस्थामा कांग्रेसको सम्पूर्ण एकता नै अहिलेको आवश्यकता रहेको बताएका छन् ।
पार्टीभित्र सहिष्णुता, संवेदनशीलता र सहअस्तित्वको भावना विकास गर्दै संवाद र सहमतिमार्फत बलियो एकता कायम गर्नुपर्ने उनको भनाइ छ । व्यक्तिगत महत्त्वाकाङ्क्षा, अहङ्कार, घमण्ड, प्रतिशोध र कुण्ठाबाट मुक्त भएर सामूहिक भावनाका साथ पार्टी एकताका लागि निर्णायक रूपमा अघि बढ्न उनले सबै नेता तथा कार्यकर्तालाई आग्रह गरेका छन् ।
सर्वोच्च अदालतको पूर्ण इजलासले पुनरावलोकनका लागि दिएको निस्सालाई पार्टी एकताका लागि अन्तिम अवसरका रूपमा लिनुपर्ने खड्काले बताएका छन् ।
उनले सभापति गगन थापालाई विशेष आग्रह गर्दै भनेका छन्, ‘तपाईं हिम्मत र साहसका साथ तत्काल पार्टीको सम्पूर्ण एकताका लागि अग्रपङ्क्तिमा अग्रसर हुनुस्, हामी अरू सबै यसका लागि सहयोगी हौँ र बन्छौँ ।’
पार्टी एकताका लागि वातावरण निर्माण गर्न कांग्रेस तथा भ्रातृ र शुभेच्छुक संस्थाका सबै तहका नेता तथा कार्यकर्तालाई पनि खड्काले अपिल गरेका छन् । राष्ट्र रहे बहुदलीय लोकतन्त्र, पार्टी र आफूहरूको अस्तित्व रहने भन्दै उनले सामाजिक सञ्जालमा हुने आरोप-प्रत्यारोप र गालीगलौज बन्द गर्न आग्रह गरेका छन् ।
