काठमाडौं । बाढी पूर्वानुमान महाशाखाले रसुवा९नुवाकोट क्षेत्रबाट थप ठूलो बाढी आउन लागेको भन्दै फैलिएका अपुष्ट सूचना तथा हल्लाको पछि नलाग्न आग्रह गरेको छ ।
महाशाखाका अनुसार पछिल्लो समय रसुवा९नुवाकोट क्षेत्रबाट निरन्तर रूपमा थप ठूलो बाढी आउन लागेको भन्दै जानकारी तथा फोन सम्पर्कहरू प्राप्त भइरहेको उल्लेख गर्दै हालसम्म प्राप्त सूचना र गरिएको प्रारम्भिक विश्लेषणअनुसार त्यस क्षेत्रमा वर्षा भइरहे पनि थप ठूलो बाढी आउने कुनै विश्वसनीय सूचना प्राप्त नभएको जनाएको छ ।
महाशाखाले रसुवा-नुवाकोट क्षेत्रमा वर्षा भइरहेकाले नदी तथा खोलाको बहाव केही बढ्न सक्ने र हालको अवस्थाले आज बिहान बाढी प्रभावित क्षेत्रमा देखिएको जस्तो थप ठूलो बाढी आउने सम्भावना नरहेको स्पष्ट पारेको छ ।
महाशाखाले बिहानको बाढीबाट प्रभावित स्थानभन्दा बाहिर सुरक्षित स्थानमा रहेका नागरिकलाई अनावश्यक रूपमा नआत्तिन र संयमित रहन आग्रह गरेको छ ।
नेपालतर्फ आगामी समयमा कुनै ठूलो बाढी प्रवेश गर्ने अवस्था देखिएमा सीमा क्षेत्रमा तैनाथ सुरक्षा निकाय तथा सम्बन्धित निकायसँग आवश्यक समन्वय गरी तत्काल पूर्वसूचना जारी गरिने महाशाखाले जनाएको छ । त्यसका लागि मोबाइल सन्देशलगायत उपलब्ध विभिन्न सञ्चार माध्यमबाट यथाशीघ्र आधिकारिक सूचना प्रवाह गरिने महाशाखाको भनाइ छ ।
महाशाखाले बाढीसम्बन्धी जानकारी प्राप्त गर्दा सामाजिक सञ्जाल वा अन्य माध्यमबाट फैलिएका अपुष्ट सूचनाभन्दा आधिकारिक स्रोतबाट प्राप्त सूचनालाई मात्र आधार मान्न आग्रह गरेको छ ।
साथै, बाढीको जोखिम पूर्ण रूपमा टरिनसकेको अवस्थामा आवश्यक सावधानी अपनाउन र सुरक्षित रहन पनि महाशाखाले सबैमा अनुरोध गरेको छ ।
