काठमाडौँ। रसुवाका बाढी प्रभावितको उद्धार, राहत तथा पुनर्स्थापनाका लागि मनकामना केबलकार र चितवन मिल्कले आर्थिक सहयोग गरेका छन्।
जारी राष्ट्रिय उद्धार, राहत तथा पुनर्निर्माण प्रयासमा सहयोग पुर्याउन चितवन को-ई ग्रुपको तर्फबाट ‘प्रधानमन्त्री दैवी प्रकोप उद्धार कोष’ मा कुल १ करोड ५० लाख रुपैयाँ जम्मा गरिएको छ।
यसअन्तर्गत नेपालको पहिलो केबलकार ‘मनकामना दर्शन प्रा.लि.’ का तर्फबाट १ करोड २५ लाख र ‘चितवन मिल्क लि.’ का तर्फबाट २५ लाख रुपैयाँ सहयोग गरिएको हो।
“हाम्रो जरा चितवन, गोरखा र हामीले कार्य गर्ने वरपरका क्षेत्रसँग गहिरोसँग जोडिएको छ। जब यी क्षेत्रमा विपत्ति पर्छ, हामी रमाइलो वा टाढा बसेर हेर्दैनौँ; हामी छिमेकी, साझेदार र एउटै समुदायका सदस्यका रूपमा अघि बढ्छौँ,” विज्ञप्तिमा भनिएको छ, “हाम्रा स्वर्गीय संस्थापक लक्ष्मणबाबु श्रेष्ठको दृढ विश्वास थियो कि हामीलाई व्यवसाय अघि बढाउन र सफल बनाउन मञ्च प्रदान गर्ने समाज र देशप्रति उत्तरदायी हुनु हाम्रो कर्तव्य हो। उहाँको यही मूल सिद्धान्तलाई अङ्गीकार गर्दै हामी आज पनि देशको साथमा उभिएका छौँ।”
यस योगदानले तत्काल राहत पुर्याउन, प्रभावित परिवारको पुनर्स्थापना गर्न र समुदायको पुनर्निर्माणका लागि भइरहेका प्रयासलाई थप बल पुग्ने विश्वास लिइएको छ।
