काठमाडौं । राष्ट्रिय स्वतन्त्र पार्टी (रास्वपा) का सांसद अमरेश सिंहले मेची–महाकाली पदयात्रा गर्ने भएका छन् । आइतबार बिहान जनकपुरधाममा सञ्चारकर्मीसँग भेटघाट गर्दै उनले छठ पर्वको भोलिपल्ट जनकपुरधामबाट मेची–महाकाली पद यात्रा गर्ने बताएका हुन् ।
मधेशलाई थप बुझ्न र मधेशलाई जोड्न पदयात्रा गर्ने उनले बताए । ‘सीताको जन्मभूमि जनकपुरमा छठको पारनको दिन गंगासागरमा अघ्र्य दिएर मेची–महकाली पदयात्रा गर्छु,’ उनले भने, ‘मेरो पदयात्राको थिम छ । समाज जोड्नु पर्छ । राजनीति भनेको समाज जोड्नका लागि हो । देशको समृद्धिका लागि हो । अबको एकताको बाटो हुनुपर्छ ।’
उनले मधेशमा ६ वटा ‘स’ शिक्षा, स्वास्थ्य, सडक, सिँचाइ, सुरक्षा र सरसफाइमा परिवर्तन रहेको बताए । पदयात्राको क्रममा आफू जनताको कुरा सुन्ने उनको भनाइ छ ।
‘पदयात्रा जनताको बीचमा गएर, जनताको कुरा सुन्छु । आफैं कम बोल्छु, जनताको बढी सुन्छु,’ उनले भने, ‘त्यसक्रममा दैनिक पाँच घण्टा हिँड्छु र ७ घण्टा जनताको कुरा सुन्छु ।’
उनले पदयात्राको क्रममा जनकपुरधामबाट गाग्रोमा माटो, पानी लिएर सुरु गर्ने र माघेसंक्रान्तिको दिन महाकाली नदीमा जौ–तिल राखेर विसर्जन गर्ने बताए ।
