काठमाडौं । गोरखामा पर्ने बूढीगण्डकी नदीमा आएको बाढीले व्यापक भौतिक क्षति पुर्याएको छ । कालो लेदोसहितको बाढीले पक्की पुल, झोलुङ्गे पुल, घर बजारहरुमा क्षति पुर्याएको छ ।
बाढीले पुर्याएको क्षतिको पूर्णविवरण आउने क्रम जारी रहेको छ । प्रारम्भिक विवरण अनुसार धार्चे गाउँपालिका-५, माछीखोलाबाट केरौजा जोड्ने झोलुङ्गे पुल बगाएको छ । धार्चे-५, माछीखोलास्थित तल्लो बस्तीमा बाढी पसेको छ ।
आरुघाट-२ र ३ जोड्ने सोतीमा रहेको फलामे पक्की पुल बगाएको छ भने चुमनुब्री-३, सल्लेरी स्थित निर्माणाधीन सहज ऊर्जा पावरहाउस र वरपर रहेका ७र८ वटा घरहरू बगाएको छ ।
आरुघाट-९, नयाँपुलस्थित आरुघाटबाट धादिङ जोड्ने पक्की पुल तीन भाग रहेकोमा गोरखा तर्फको एक भाग बगेर बाटो पूर्णरुपमा अवरुद्ध भएको छ । साथै धार्चे-३, सल्लेरीस्थित २०/२२ घरहरू जोखिममा रहेको छ ।
सरकारले प्रभावित क्षेत्रमा नेपाली सेनाको हेलिकप्टर परिचालन गरिएको छ । नेपाल प्रहरी पनि परिचालन भएको छ । प्रहरीले विभिन्न स्थानमा बस्ती खाली गराउने र स्थानीयलाई सुरक्षित स्थानमा सार्ने काम गरिरहेको छ । बाढीको प्रभाव गोर्खा, धादिङ, तनहुँ, मुग्लिन हुँदै चितवनसम्म पर्न सक्ने देखिएको छ ।
