काठमाडौं । नेपाल प्रिमियर लिग (एनपीएल)मा पोखरा एभेन्जर्सका पूर्वकप्तान कुशल भुर्तेलले यसपाली पनि झ्याल फुटाएका छन् । कीर्तिपुरस्थित त्रिवि मैदानमा जारी खेलमा उनले चौका प्रहार गर्दा स्कोर बोर्ड राखेको घरको झ्यालको सिसा फुटेको हो ।
काठमान्डु गोर्खाजविरुद्धको म्याचमा भुर्तेल तेस्रो नम्बरमा ब्याटिङ गर्न आएका थिए । पाचौं ओभरमा उनले काठमाडौंका कप्तान करण केसीलाई लगातार तीन चौका प्रहार गरे ।
पहिले चौका हान्दा उनको प्रहार यति सशक्त थियो कि दुई पटक बल बाउन्स भएर लाग्दा पनि झ्याल फुट्यो । एनपीएलमा कुशलले झ्याल फुटाएको यो दोस्रो पटक हो । अघिल्लो सिजनमा उनले छक्का प्रहार गर्दा कमेन्ट्री बक्सको झ्यालमा लागेर भ्वाङ परेको थियो ।
Appharu.com