युएई पुगेर घानीले भने, ‘देशलाई रक्तपात हुनबाट जोगाउन भागेको हुँ’ « Drishti News – Nepalese News Portal
Logo

युएई पुगेर घानीले भने, ‘देशलाई रक्तपात हुनबाट जोगाउन भागेको हुँ’


एजेन्सी


दुवई । अफगानिस्तानका राष्ट्रपति असरफ घानीले देशलाई रक्तपात हुनबाट जोगाउन देश छाडेको बताएका छन् । तालिबानले सत्ता कब्जा गरेपछि देश छाडेर दुवईको शरणमा पुगेको घानीले भने, ‘देशमा रक्तपात हुनबाट बचाउन देश छोडेको हुँ ।’

उन गत आइतबार देश छोडेर ताजिकिस्तानतर्फ लागेका थिए । त्यहाँबाट उनी अहिले संयुक्त अरब इमिरेट्स युएई पुगेका छन् । उनलाई बुधबार साँझ युनाइटेड अरब इमिरेट्समा स्वागत गरिएको छ । उनको साथमा उनका परिवार पनि रहेका छन् ।

हिंस्रकरूपमा तालिबानीले विभिन्न सहर हुँदै राजधानी काबुल कब्जा गर्न थालेपछि उनले गएको आइतबार देश छोडेका थिए । देश छोडेपछि पहिलो पटक आफ्नो भनाइ राख्दै उनले आफूले देशमा रक्तपात हुने देखेर नै त्यसबाट बचाउनका लागि देश छोडेर हिँडेको भनाइ सार्वजनिक भएको हो ।

उनले बुधबार आफ्नो राष्ट्रिय भाषा पास्तोमा सम्बोधन गर्दै सो धारणा राखेका थिए । त्यसक्रममा उनले आफ्ना पूर्वमन्त्रीले देश छोडेर भागेको भनी गरेको आलोचनाको पनि बचाउ गरेका छन् ।

उनलाई आफ्नै मन्त्रिपरिषद्का कतिपय मन्त्रीले देश नै अफ्ठ्यारो स्थितिमा परेको अवस्थामा आफूहरु र देशलाई नै छोडेर घानी भागेको भनेर आलोचना गरेका थिए । गएको आइतबार यता काबुललाई तालिबानीले कब्जामा लिएका छन् । उनीहरुले तालिबानी सरकार गठनको तयारी पनि गरिरहेका छन् ।

काबुलबाट प्राप्त समाचारअनुसार त्यहाँ जताततै तालिबानका हतियारधारी लडाकूले गस्ती गरिरहेका देखिएको छ । सडकमा महिलाको संख्या कम देखिए पनि दैनिक जनजीवनका अन्य गतिविधि सामान्य बन्दै गएको जस्तो देखिएको छ ।

काबुल अन्तरराष्ट्रिय विमानस्थल बाहिर अस्तव्यस्त अवस्था कायम नै रहेको विभिन्न अन्तरराष्ट्रिय सञ्चारमाध्यमले जनाएका छन् । तालिबानका लडाकू तथा अन्य सदस्यले विमानस्थल परिसर पस्न खोज्ने अफगानीलाई रोकिरहेका छन् । तालिबानले नै अहिले काबुलको सुरक्षा गरिरहेको बताइएको छ ।

प्रतिक्रिया दिनुहोस्