तालिवान क्रुरताको संकेत, चार जनाको शव सार्वजिनक स्थानमा झुन्ड्याइयो « Drishti News – Nepalese News Portal
Logo

तालिवान क्रुरताको संकेत, चार जनाको शव सार्वजिनक स्थानमा झुन्ड्याइयो


दृष्टि संवाददाता


काठमाडौं । अफगानिस्तानको पछिल्लो एउटा घटनाले तालिबान सरकारकोे विगतको क्रुरतालाई संकेत गरेका छ । अफगानिस्तानको हेरात सहरमा तालिबानले चार सन्दिग्ध अपहरणकारीका शवलाई सार्वजनिक स्थानमा झुन्ड्याइदिएको छ ।

अन्तर्राष्ट्रिय समाचार एजेन्सीहरुले जनाएअुनसार तालिबानका एक कुख्यात अधिकारीले मृत्युदण्ड र अङ्गच्छेनजस्ता कठोर दण्ड फेरि दिन थालिने चेतावनी दिएको भोलिपल्ट उक्त घटना भएको हो । एक व्यापारी र उनका छोरालाई अपहरण गरेको आरोप लागेका ती चार जनाको एउटा भिडन्तमा मृत्यु भएको एक स्थानीय अधिकारीले बताएका छन् । समाचारसंस्था एपीलाई प्रत्यक्षदर्शीले हेरातको केन्द्रमा एउटा क्रेनमा शव झुन्ड्याइएको आफूले देखेको बताएका छन् ।

पसल सञ्चालन गर्दै आएका वजिर अहमद सिद्दिकीले एपीलाई बताएअनुसार उक्त स्थानमा चारवटा शव ल्याइएको र त्यहाँ एउटा झुन्ड्याइएको थियो भने बाँकी तीन वटालाई सहरका अन्य स्थानमा देखाउन लगिएको थियो ।

हेरातका सहायक गभर्नर मौलवी शैर अहमद एमरलाई उद्धृत गर्दै स्थानीय सञ्चारमाध्यमले तालिबान लडाकुहरूले अपहरणको आरोप लागेका ती मानिसलाई फेला पारेको र गोली हानाहानमा उनीहरूको मृत्यु भएको जनाएका छन् ।

‘हामीले अरू अपहरणकारीलाई चेतावनी दिन तिनका शवलाई हेरातका चोकहरूमा झुन्ड्यायौँ’ उनले भनेका छन् । सामाजिक सञ्जालमा प्रेषित बीभत्स तस्बिरमा एउटा पिकअप ट्रकको पछाडिपट्टि रक्ताम्मे शवहरू राखिएको र एउटा क्रेनले एउटा शव उठाइरहेको देखिन्छ । अर्को एउटा भिडिओमा एक व्यक्तिको शव झुन्ड्याइको र उनको छातीमा ‘अपहरणकारीहरूलाई यसरी दण्ड दिइन्छ’ लेखिएको देखिन्छ ।

गत महिना अल्पसंख्यक हजारा समुदायका नौ सदस्यको हत्यामा तालिबान लडाकुहरू संलग्न भएको एम्नेस्टी इन्टरन्याश्नलले जनाएको थियो । उक्त संस्थाका महासचिवले ‘क्रुरूरतापूर्वक’ गरिएका ती हत्याले तालिबानको विगत र तालिबानको शासनमा फेरि के हुनसक्छ भन्ने संकेत गरेको बताएका थिए ।

प्रतिक्रिया दिनुहोस्