काठमाडौं । नेपाल-भारत संयुक्त परियोजना अनुगमन समिति (जेपीएमसी)ले भूकम्पपछिको पुनर्निमार्ण परियोजनाहरूको प्रगतिबारे समिक्षा गरेको छ ।
बिहीबार भारत सरकार विदेश मन्त्रालय (उत्तरी महाशाखा)का सहसचिव श्री अनुराग श्रीवास्तव र नेपाल सरकार राष्ट्रिय पुनर्निर्माण प्राधिकरणका सचिव श्री सुशीलचन्द्र तिवारीको सह–अध्यक्षतामा पुनर्निमार्ण परियोजनाहरूको प्रगतिबारे समिक्षा गरिएको हो ।
भारत सरकारको सहयोगमा नेपालमा संचालित भूकम्प पछिको पुनर्निमार्ण परियोजनाहरुको प्रगतिको समिक्षा गर्न हेतु सन् २०१७ अगस्टमा संयुक्त परियोजना अनुगमन समिति (जेपीएमसी) संयन्त्रको स्थापना भएको थियो ।
उक्त बैठकमा नेपाल सरकारका सम्बन्धित मन्त्रालय, विभाग एवम् निकायका प्रतिनिधि, भारत सरकारका अधिकारी, परामर्शदाता तथा परियोजनाको कार्यान्वयनमा संलग्न सरोकारवालाहरुको उपस्थिति थियो । यसअघि जेपीएमसीको बैठक २०७६ फाल्गुण २५ गते भएको थियो ।
बैठकले भारत सरकारको सहयोगमा नेपालका आवास, शिक्षा, स्वास्थ्य र सांस्कृतिक सम्पदाको क्षेत्रमा संचालित भूकम्प पछिको पुनर्निर्माण परियोजनाहरुको प्रगतिको बृहत समिक्षा गर्यो ।
आवासको क्षेत्रमा भारत सरकारको आर्थिक सहयोगमा गोरखा र नुवाकोट जिल्लामा सफलतापूर्वक ५०,००० निजी घरको पुनर्निर्माण भएकोमा बैठकमा दुवै पक्षले सन्तुष्टि व्यक्त गरेका थिए ।
त्यस्तै दुवै पक्षले शिक्षा, सांस्कृतिक सम्पदा र स्वास्थ्यको क्षेत्रमा अघि बढिरहेका पुनर्निर्माण परियोजनाहरुमा भएको प्रगतिको सराहना गरेका थिए । जेपीएमसीको अर्को बैठक दुवै पक्षलाई पायक पर्ने मितिमा गर्ने सहमति भयो ।
