इटहरी । सुनसरीको रामधुनी नगरपालिका ८ को वडा अध्यक्ष पदका लागि स्वतन्त्र उम्मेदवारी दिएका गणेश पौडेल मृत अवस्थामा भेटिएका छन् ।
छुट्टै प्यानल नै बनाएर पार्टीका उम्मेदवारविरुद्ध स्वतन्त्र उम्मेदवारी दिएका पौडेलको शव शनिबार आफ्नै घरपछाडि भेटिएको थियो ।
तीन दिनअघि पौडेल अपहरणमा परेको भन्दै खोजीका लागि परिवारले प्रहरीमा उजुरी दिएको थियो । त्यसको भोलिपल्ट सम्पर्कमा आएका पौडेलले आफू साथीको घरमा बसेको बताएका थिए । तर, शनिबार भने मृत अवस्थामा भेटिएका हुन् ।
नेपाली कांग्रेसका क्रियाशील नेता रुपमा सक्रिय पौडेलले वडाध्यक्षको दाबी गरेपनि पार्टीले उम्मेदवार नबनाएपछि बागी उम्मेदवारी दिएका थिए । त्यसपछि पार्टीले उम्मेदवारी फिर्ता गर्न दबाब दिएको थियो । उम्मेदवारी फिर्ता नलिएपछि कांग्रेसले साधारण सदस्यसमेत नरहने गरि कारबाही गर्ने निर्णय गरेको थियो ।
मृत भेटिएका पौडेलले आत्महत्या गरेको हुनसक्ने प्रहरीले अनुमान गरेको छ । घटना सम्बन्धमा थप अनुसन्धान भइरहेको प्रहरीले जानकारी दिएको छ ।
