काठमाडौं । काठमाडौं जिल्ला अदालतले राजधानीको सितापाइलामा दुई वर्षअघि भएको एसिड आक्रमणका दुई जना
अभिुयुक्तलाई सजय सुनाएको छ ।
न्यायाधीश प्रकाशप्रसाद पण्डितको इजलासले योजनाकार मोहम्मद आलम र भारतीय नागरिक मुन्ना मोहम्मदलाई जनही ७ वर्ष कैद सुनाएको हो । साथै दुई जनालाई पाँच लाख जरिवाना र पीडितलाई १५ लाख रुपैयाँ क्षतिपूर्ति भराउने फैसला सुनाएको छ ।
२०७७ साउन ११ गते काठमाडौंको सितापाइलामा ओखलढुंगाकी पवित्रा कार्कीमाथि उनीहरुले एसिड आक्रमण गरेका थिए । उनीहरु एसिड प्रहार गरेकै दिन पक्राउ परेका थिए ।
अदालतले डेढ वर्षमा पीडितलाई न्याय दिँदै दोषीलाई सजाय तोकेको पीडित किशोरी कार्कीका कानुन व्यवसायीले जानकारी दिए ।
आलमले ढल्कुस्थित आफ्नो ब्याग गार्मेन्टमा काम गर्ने मजदुरकी बहिनीलाई एसिड आक्रमण गर्न लगाएका थिए । आफूले भनेअनुसार गर्न नमानेपछि ती महिलामाथि एसिड आक्रमण भएको प्रहरीको अनुसन्धानबाट खुलेको थियो ।
सुनिता थापाको जाहेरी अनुरुप प्रहरी छानविनपछि जिल्ला सरकारी वकील कार्यालयले एसिड आक्रमणमा संलग्न आलम र मोहम्मदविरुद्ध २०७७ साल भदौ २ गते काठमाडौं जिल्ला अदालतमा अभियोगपत्र आरोपपत्र दायर गरेको थियो ।
