काठमाडौं । राष्ट्रिय स्वतन्त्र पार्टीका सभापति रवि लामिछाने र जनमत पार्टीका अध्यक्ष सीके राउतबीच भेटवार्ता भएको छ ।
लामिछाने र राउतबीच आज (मंगलबार)काठमाडौंमा भेटवार्ता भएको हो । भेटमा पछिल्लो राजनैतिक घटनाक्रमबारे छलफल भएको रास्वपा सचिवालयले जनाएको छ । मंसिर ४ को आम निर्वाचनबाट उदाएका दुई पार्टीका अध्यक्ष लामिछाने र राउतले बेशाख १० गते सम्पन्न उपनिर्वाचनको समिक्षासमेत गरेको जनाइएको छ ।
नयाँ र केही गरौं भन्दै नेपालको राजनीतिमा उदाएका नयाँ शक्तिहरूबीच स्वच्छ प्रतिस्पर्धा आवश्यक रहेको रास्वपाका सभापति लामिछानेले बताए ।
भेटपछि रास्वपाको फेसबुक पेजमा लेखिएको छ, ‘नयाँ शक्तिहरू बीचको सौहार्दता स् नयाँ र केही गरौं भन्दै नेपालको राजनीतिमा उदाएका नयाँ शक्तिहरूबीच हार्दिकता र स्वच्छ प्रतिस्पर्धा आजको आवश्यकता हो ।’
लामिछाने र राउतले मंसिर ४ को आम निर्वाचनबाट निर्वाचित भएर पहिलो पटक संसद भवनको यात्रा तय गरेका हुन् । राउत सप्तरी-२ का सांसद हुन भने लामिछाने चितवन-२ बाट निर्वातिच भएका थिए । नगरिकता विवादमा सर्वोच्च अदालतले सांसद पद खारेज गरेपछि रास्वपा सभापति लामिछने उपनिर्वाचनबाट पुन निर्वाचित भएका हुन् ।
