काठमाडौं । सत्तारुढ दलका शीर्ष नेताहरूको बैठकले प्रधानमन्त्री पुष्पकमल दाहाल ‘प्रचण्ड’ले विश्वासको मत लिनुनपर्ने निष्कर्ष निकालेको छ । शनिबार प्रधानमन्त्रीको सरकारी निवास बालुवाटारमा बसेको बैठकमा प्रधानमन्त्री प्रचण्डले फेरि विश्वासको मत लिनुनपर्ने निष्कर्ष निकाले हो ।
माओवादी केन्द्रका प्रमुख सचेतक हिताराज पाण्डेले राष्ट्रिय स्वतन्त्र पार्टी रास्वपाले सरकारलाई दिएको समर्थन फिर्ता लिएपनि प्रधानमन्त्रीले फेरि विश्वासको मत लिनुनपर्ने बताए ।
यसअघि प्रधानमन्त्रीले विश्वासको मत लिँदा रास्वपाले विश्वासको मत दिएको तर, सरकारमा सहभागी नभएकाले पुनः विश्वासको मत लिनुनपर्ने बैठकमा नेताहरुले जोड दिएको उनको भनाई छ ।
बैठकमा प्रदेश सरकारलाई पूर्णता दिने विषयमा पनि छलफल भएको छ । आगामी आर्थिक वर्षको नीति तथा कार्यक्रम बारेमा पनि छलफल भएको हो ।
त्यस्तै, जनतामा निराशा देखिएकाले कस्ता योजना समेट्ने भन्ने विषयमा पनि छलफल भएको छ । बैठकमा संसदमा प्रस्तुत गरिने आउँदो वर्षको बजेटका सिद्धान्त र प्राथमिकताका विषयमा छलफल भएको छ ।
माओवादी सचेतक पाण्डेका अनसार संसद् बैठकलाई कसरी व्यवस्थित बनाउने भन्ने बारेमा पनि छलफल भएको हो । निजामती ऐन, संघीय शिक्षा ऐनका बारेमा समेत छलफल भएको उनले जानकारी दिए ।
