Logo
Logo

प्रधानमन्त्री आज यूएई जाँदै




काठमाडौं । प्रधानमन्त्री पुष्पकमल दाहाल ‘प्रचण्ड’ आज संयुक्त अरब इमिरेट्स (यूएई) जाँदैछन् ।

जलवायु परिवर्तनसम्बन्धी संयुक्त राष्ट्रसंघीय फ्रेमवर्क कन्भेन्सन (कोप–२८) मा सहभागी हुन नेपाली प्रतिनिधिमण्डलको नेतृत्व गर्दै उनी बेलुकी साढे ९ बजे त्यसतर्फ प्रस्थान गर्ने भएका हुन् ।

नोभेम्बर ३० देखि डिसेम्बर १२ सम्म यूएईको दुबईमा हुने सम्मेलनलाई प्रधानमन्त्री प्रचण्डले डिसेम्बर २ मा सम्बोधन गर्ने परराष्ट्र मन्त्रालयले जनाएको छ । त्यसअघि प्रधानमन्त्री डिसेम्बर १–२ मा हुने जलवायु शिखर सम्मेलनको उच्चस्तरीय बैठकमा सहभागी हुनेछन् ।

प्रचण्ड संयुक्त अरब इमिरेट्सको ५२औँ ‘युनियन डे’को अवसरमा आयोजना हुने कार्यक्रममा पनि सहभागी हुनेछन् । उनी यूएईले आयोजना गर्ने ‘जायेद सस्टेनेबिलिटी प्राइज अवार्ड’ समारोहमा पनि सहभागी हुने तालिका रहेको मन्त्रालयले बताएको छ ।

सम्मेलनको ‘साइड लाइन’मा प्रधानमन्त्रीले विभिन्न देशका राष्ट्रप्रमुख, सरकारप्रमुख र उच्च पदस्थ व्यक्तिसँग वार्ता गर्नेछन् ।

प्रधानमन्त्रीले अबुधाबीस्थित नेपाली राजदूतावासको भ्रमण गर्नुका साथै नेपाली समुदायसँग अन्तरक्रिया गर्ने कार्यक्रम पनि तय भएको छ । यस्तै नेपाल–यूएई व्यापार शिखर सम्मेलनलाई सम्बोधन गर्ने कार्यक्रम पनि छ ।

प्रधानमन्त्री नेतृतवको टोलीमा छोरी गंगा दाहाल, वन तथा वातावरणमन्त्री डा. वीरेन्द्रप्रसाद महतो र अन्य सरकारी अधिकारी हुनेछन । उनीहरु मंसिर १७ गते स्वदेश फर्किने मन्त्रालयले जनाएको छ ।

प्रतिक्रिया दिनुहोस्