काठमाडौं। सन्दीप लामिछानेको कप्तानीमा रहेको नेपाल रेडले कोर क्यापमा लगातार दोस्रो जित निकालेको छ। आज भएको खेलमा नेपाल रेडले नेपाल यल्लोलाई आठ विकेटले पराजित गरेको हो । यल्लोको कप्तानी दीपेन्द्रसिंह ऐरीले गरेका थिए ।
यसअघि रेडले रोहितकुमार पौडेलको कप्तानीमा रहेको नेपाल ब्ल्युलाई १९९ रनले पराजित गरेको थियो । यल्लोले भने आसिफ शेखको कप्तानीमा रहेको नेपाल ग्रिनलाई १७ रनले हराएको थियो ।
यल्लोले दिएको १५९ रनको लक्ष्य पछ्याएको रेडले २९.४ ओभरमा दुई विकेट गुमाउँदै १६२ रन बनायो ।
रेडका अर्जुन साउदले सर्वाधिक ८६ रन बनाए । अविजित रहेका उनले ९६ बलमा १२ चौका र एक छक्का प्रहार गरे । शुभ कंशाकार ३० र त्रितराज दास २९ रनमा आउट हुँदा बसिर नौ रनमा अविजित रहे । यल्लोका अभिनाष बोहरा र अजय चौहानले समान एक विकेट लिए ।
