काठमाडौं । नेपालको कानुनी शासन र प्रहरी प्रशासनको प्रभावकारितामाथि गम्भीर प्रश्न उठेको छ । मोरङ जिल्ला अदालतबाट पक्राउ पुर्जी जारी भएका लुम्बिनी प्रदेश सभा सदस्य विष्णु पन्थी सोमबार लुम्बिनीमा आयोजित बुद्ध जयन्ती कार्यक्रममा प्रधानमन्त्री केपी शर्मा ओलीसँगै अतिथिको रूपमा देखिए । तर, कार्यक्रममा उनको उपस्थितिको हल्ला फैलिएसँगै उनी प्रहरीको आँखा छलेर फरार भएको खबर बाहिरियो ।
कपिलवस्तु निर्वाचन क्षेत्र नम्बर १ (क) बाट नेकपा (एमाले) बाट निर्वाचित ५० वर्षीय पन्थीविरुद्ध २०८१ असार १२ मा मोरङ जिल्ला अदालतले पक्राउ पुर्जी जारी गरेको थियो । उनी सञ्चालक रहेको गौतमबुद्ध हाइड्रोपावर प्रालिले पल्लवी इलेक्ट्रा प्रालिको बक्यौता भुक्तानी नगरेको व्यापारिक लेनदेन मुद्दामा अदालतले पन्थी र उनका साझेदार देवराज खनाललाई जनही ६ महिना कैद सजायको फैसला गरेको थियो । २०८१ जेठ ३२ मा भएको यो फैसलापछि पन्थी फरार रहेको बताइएको छ ।
प्रहरी बेखबर
लुम्बिनीमा आयोजित बुद्ध जयन्तीको भव्य कार्यक्रममा पन्थी प्रधानमन्त्री ओलीसँगै मञ्चमा देखिनुले प्रहरी र प्रशासनको लापरवाही छताछुल्ल भएको छ । अदालतको पक्राउ आदेश कार्यान्वयन गर्न काठमाडौँ हुँदै रुपन्देही प्रहरीमा पत्राचार भएको भए पनि पन्थीले निर्बाध रूपमा सार्वजनिक कार्यक्रममा सहभागिता जनाउनुले कानुनी प्रक्रियाको धज्जी उडाएको छ । लुम्बिनी प्रदेश प्रहरी कार्यालयका डीआईजी राजेन्द्र प्रसाद भट्टले पन्थीविरुद्ध पुर्जी जारी भएको जानकारी आफूलाई प्राप्त भएको बताए पनि उनको भनाइले प्रहरीको ढिलासुस्ती र कमजोर समन्वयलाई उजागर गरेको छ ।
राजनीतिक संरक्षण
पन्थीको फरारी अवस्था र सार्वजनिक कार्यक्रममा निर्बाध सहभागिताले राजनीतिक संरक्षणको आशङ्का उब्जाएको छ । नेकपा (एमाले) को प्रभावशाली नेताको रूपमा चिनिने पन्थीविरुद्ध प्रहरीले किन तदारुकता देखाएन ? यो प्रश्नले सत्तारुढ दलको प्रभाव र प्रहरी प्रशासनको स्वतन्त्रतामाथि गम्भीर प्रश्न उठाएको छ । सामान्य नागरिकलाई सानातिना कसुरमा तत्काल पक्राउ गर्ने प्रहरीले एक वर्षदेखि फरार सांसदलाई किन पक्राउ गर्न सकेन ? यो घटनाले नेपालमा कानुनी शासनको अवस्था र शक्तिको दुरुपयोगको चित्र स्पष्ट रूपमा देखाएको छ । नागरिक समाज र सामाजिक सञ्जालमा यो घटनाले तीव्र आलोचना निम्त्याएको छ ।
