काठमाडौं । राष्ट्रिय स्वतन्त्र पार्टी (रास्वपा) की सांसद सुमना श्रेष्ठले मिटर ब्याज कहिले न्याय पाउने भन्दै सरकारसँग प्रश्न गरेकी छन् । मङ्गलवार प्रतिनिधिसभाको शून्य समयमा बोल्दै सांसद श्रेष्ठले मिटर ब्याज पीडितको समस्या समाधानका लागि ठोस कदम चाल्न सरकारलाई आग्रह गरिन् ।
उनले गौरीबहादुर कार्कीको सुझाव र तेजबहादुर कार्की नेतृत्वको आयोगले तयार पारेको कार्यविधि कार्यान्वयन गरेमा ८० प्रतिशत पीडितको समस्या समाधान हुने बताइन् । “कार्यविधि स्वीकृत र कार्यान्वयन गर्ने हो भने अधिकांश समस्या हल हुन्छ, तर त्यसका लागि दोषीलाई कारबाही गर्नुपर्छ,” उनले भनिन् । “पीडितलाई बारम्बार आन्दोलन गर्न बाध्य बनाइएको छ । आयोगमाथि आयोग थपेर पीडितको समस्या झन् जटिल बनाइँदै छ । राज्यको नीति के हो ? ”
सांसद श्रेष्ठले सोमबार भएको छलफलमा आयोगका अध्यक्षले पीडितको मागअनुसार काम गर्न नसकिने अभिव्यक्ति दिएको उल्लेख गर्दै यसअघिको आयोगलाई असहयोग गरिएको र अहिले कामचलाउ प्रतिवेदन तयार गर्न अर्को आयोग गठनको तयारी भइरहेको बताइन् ।
सिंहदरबारमा पीडितलाई प्रवेश निषेध गरिएकोप्रति असन्तुष्टि जनाउँदै उनले मिटर ब्याज पीडितमाथि राजनीति नगर्न र साहु–महाजनको संरक्षण गर्न छाडेर पीडितलाई तत्काल न्याय दिन सरकारसँग माग गरिन् ।
