बुटवल । शुक्रबार रातिको अविरल बर्षाका कारण सडक भत्किएपछि बर्दघाट–दाउन्ने खण्ड पूर्ण रूपमा बन्द भएको छ । शुक्रबार रातिदेखि बर्दघाट–दाउन्ने खण्ड भत्किएपछि पूर्व–पश्चिम राजमार्ग अवरूद्ध भएको छ ।
पश्चिमबाट पूर्व जाने सवारी साधन बर्दघाट र पूर्वबाट पश्चिम आउने सवारी साधन दुम्किबासतर्फ रोकिएका छन् । प्रहरीका अनुसार बर्दघाट नगरपालिका वडा नम्बर ४ अन्तर्गत पर्ने खुर्सानी खोला नजिकै सडकको डिल भत्किएको छ ।
दाउन्ने र बर्दघाट बजारको बीचमा पर्ने खुर्सने खोला क्षेत्रमा करिब ७ मिटर सडकको डिल भत्किएको छ भने बिस्तारको क्रममा गरिएको कालोपत्रे पनि उप्किएको छ ।
इलाका प्रहरी कार्यालय बर्दघाटका प्रमुख प्रहरी निरीक्षक दीपेन्द्र बानियाँले वर्षाका कारण शुक्रवार रातीदेखि उक्त सडक पुर्ण रुपमा अवरुद्ध बनेको हो । भत्किएर अवरुद्ध बनेको सडक खुलाउन आज बिहानैदेखी प्रयास गरिएपनि सञ्चालनमा आउन नसकेको प्रहरीले जनाएको छ ।
दाउन्ने सडक खण्ड केही दिनअघि आंशिक रूपमा बन्द गरेर सडक निर्माण कार्य भइरहेको थियो । बिस्तारको क्रममा दायाँबायाँ भित्ता खनिएको कारण उक्त सडक घाम लाग्दा धुल्लाम्मे र पानी पर्दा हिलाम्मे हुने गरेको छ । पानी पर्दा हिलाम्मे बनेको सडक चिप्लिएर पटकपटक यातायात बन्द हुने गरेको छ ।
